سیناتۆر لینزی گراهام کە یەکێک بوو لە سیناتۆرە هەرە ناسراوەکانی کۆمارییەکان و دۆستی گەلی کورد، لە تەمەنی 71 ساڵیدا کۆچی دوایی کرد.
ئۆفیسی سیناتۆر گراهام بەرەبەیانی یەکشەممە بە کاتی واشنتنی پایتەخت ڕایگەیاند ،" شەوی شەممە ڕێکەوتی 11 ی مانگی حەوت، ئەندامی ئەنجومەنی سینات لینزی گراهام لە ئاکامی نەخۆشییەکی لەناکاو و کورت خایەن کۆچی دوایی کرد. خانەوادەی سیناتۆر گراهام سوپاس هەموو ئەوانە دەکەن کە نوێژ و نزای بۆ دەکەن، داوا دەکەن ڕێز لە تایبەتمەندییەکانی بگرن لەم ماوە سەختەدا."
سەرۆک ترامپ لە پێگەکەی لەسەر تروث سۆشیال لەم بارەیەوە نووسی،"سیناتۆر لینزی گراهام، کە یەکێک بوو لە کەسایەتی و سیناتۆرە مەزنەکانی کە ناسیومن کۆچی دوایی کرد! هەمیشە بە ڕژدی کاری دەکرد، و کەسێکی نیشتمانپەروەری ڕاستەقینەی ئەمەریکا بوو. کۆچی لینزی لەدەستدانێکی گەورەیە! دواتر وردەکارییەکان و مەراسیمی بە خاکسپاردنەکەی ڕادەگەیەنرێت. ئای کە هەواڵێکی غەمگینە!
نێچیرڤان بارزانی سەرۆکی هەرێمی کوردستان پەیامی سەرەخۆشی بۆ کۆچی سیناتۆر لینزی لە پێگەکەی لەسەر ئێکس بڵاوکردەوە و نووسیویەتی، "زۆر غەمگینم بە کۆچی دوایی سیناتۆر لینزی گراهام، دۆستی ئازیزی گەلی کوردستان. داکۆکی و پشتیوانییە نەگۆڕەکەی لە کوردستان هەمیشە جێی ڕێز و پێزانینمان دەبێت. سەرەخۆشی لە خانەوادەکەی هاوڕێی و هاوکارانی دەکەم."
مەسرور بارزانی، سەرۆکی حکومەتی هەرێمی کوردستان، ئەویش سەرەخۆشی خۆی ڕاگەیاند و نووسیویەتی،"بە داخ و پەژارەیەکی زۆرەوە هەواڵی کۆچی دوایی سیناتۆر لینزی گراهامم پێگەیشت. سەرەخۆشی لە خانەوادەکەی و دۆستانی و ڕێبەرایەتی ئەنجومەنی سینات و ئەندامانی ئەنجومەنی سینات دەکەم. گەلی کوردستان هەمیشە دۆستایەتی و پاڵپشتی بەردەوامی گراهام لە یاد ناکەن."
سیناتۆر لینزی گراهان، 9 ی مانگی حەوتی 1995 لە شارۆچکەی سێنتراڵ لە ویلایەتی ساوث کارۆلاینا لەدایکبووە، لە تەمەنی گەنجییەوە دایک و باوکی بە نەخۆشی لەدەستدا و کاتێک تەمەنی 22 ساڵ بووە بەرپرس بووە لە پەروەردەکردنی خوشکە تاقانەکەی و لەگەڵ ئەوەشدا توانی خوێندنی زانکۆ تەواو بکات و بڕوانامەی بەکالۆریۆسی لە دەروونناسی لە زانکۆی ساوث کارۆلاینا بەدەستبهێنێت. دواتر لە ساڵی 1981 لە هەمان زانکۆ بڕوانامەی دکتۆرای لە یاسا بەدەستهێنا.
پاشان پەیوەندی بە لەشکرەوە کرد و لە بواری یاسایی لەوێ خزمەتی کرد.
زوو تێکەڵ بە جیهانی سیاسی بووە و لە ساڵی 1992 بۆ یەکەم جار هەڵبژێردرا بۆ ئەندامێتی لە ئەنجومەنی نوێنەرانی ویلایەتی ساوث کارۆلاینا. ساڵی 1994 خۆی بۆ ئەنجومەنی نوێنەرانی کۆنگرێسی ئەمەریکا کاندیدکرد و هەڵبژێردرا. لە مانگی یەکی 1995 لە ئەنجومەنی نوێنەرانی ئەمەریکا دەستبەکاردەکات و بۆ چوار خول هەتا ساڵی 2002 هەڵدەبژێردرێتەوە. ساڵی 2002 لە هەڵبژاردنەکانی ئەنجومەنی سینات سەرکەوتوو دەبێت و لە مانگی یەکی 2003 دەبێتە ئەندامی ئەو ئەنجومەنە.
سیناتۆر لینزی گراهام کە بۆ ماوەی 31 ساڵ لە کۆنگرێسی ئەمەریکا خزمەتی کرد و شارەزای بواری بەرگری و سیاسەتی دەرەوە بوو، زۆر دۆستی کورد بوو و لە سەردەمی ڕووخاندنی ڕژێمی سەدام حسێن دیکتاتۆری عێراق ڕۆڵێکی گرنگی هەبوو لە پشتیوانییەکانی ئەمەریکا بۆ کورد نەک تەنیا لە عێراق بەڵکو لە سوریاش.