کۆشکی سپی لە پەیامێکدا لە هەژماری خۆی لە تۆڕی کۆمەڵایەتی ئێکس، پیرۆزبایی ڕۆژی دایک لە ملیۆنان دایک لە سەرانسەری ئەمەریکا دەکات و ڕۆڵی دایکان لە داڕشتنی نەتەوەی ئەمەریکا بە بەرز دەنرخێنێت.
لە پەیامەکەدا هاتووە کە خۆشەویستی و قوربانیدان و هێزی دایکان ڕۆڵێکی بنەڕەتی لە کۆمەڵگەی ئەمەریکادا گێڕاوە و هەروەها کۆشکی سپی لەم ڕۆژەدا سوپاسی تایبەتی میلانیا ترامپ، خانمی یەکەمی ئەمەریکا و ئوشا ڤانس، خانمی دووهەمی وڵاتەکە دەکات.
پەیامی کۆشکی سپی بە دەستەواژەی "ڕۆژی دایک پیرۆز بێت لە کۆشکی سپییەوە" کۆتایی هاتووە.
ڕۆژی دایک لە ئەمەریکا بۆنەیەکی گرنگی خێزانی و کۆمەڵایەتییە کە ساڵانە لە دووەم یەکشەممەی مانگی پێنج بەڕێوەدەچێت. لەم ڕۆژەدا خێزانەکان بە پێدانی گوڵ و کارتی پیرۆزبایی و دیاری ڕێز لە دایکان و ڕۆڵی ئەوان لە ژیانی خێزاندا دەگرن. هەروەها زۆرێک لە ئەمەریکاییەکان ئەم بۆنەیە بە دەرفەتێک دەزانن بۆ کۆبوونەوەی خێزانی و سوپاسگوزاری دەربڕین بۆ قوربانیدان و پشتیوانی دایکانیان.