ڕۆژی چوارشەممە ڕێکخراوی شۆمم کە رێکخراوێکی پاراستنی جووەکانە لە تۆڕی کۆمەڵایەتی ئێکس ڕایگەیاند ، لە باکووری لەندەن کەسێکیان ڕادەستی پۆلیس کردووە، کە لە گەڕەکی گۆڵدەرز گرین بە چەقۆ هێرشی کردووەتە سەر هاووڵاتییە جووەکان.
لە ئەنجامی ئەم پەلامارەدا دوو هاووڵاتی جوو بریندار بوون و گەیەندراونەتە نەخۆشخانە بۆ وەرگرتنی چارەسەر . هەتا ئێستا ناسنامەی هێرشبەرەکە ئاشکرا نەکراوە.
سەرۆک وەزیرانی بەریتانیا کیێر ستارمەر لە تۆڕی کۆمەڵایەتی ئێکس سەرکۆنەی هێرشەکەی کردووە و ڕایگەیاندووە هێرشکردنە سەر جووەکان هێرشە بۆ سەر بەریتانیا.
ستارمەر سوپاسی ڕێکخراوی شۆمم، هاتزۆلا و پۆلیسی کردووە بۆ ئەوەی دەستبەجێ هەنگاویان ناوە.
هەروەها دەشڵێت " بەرپرسیاران دەخرێنە بەردەم دادگا."
جێی ئاماژەیە لە مانگی ڕابردووەوە پۆلیسی لەندەن زیاتر لە 24کەسیان دەستگیرکردووە کە هەوڵی هێرشیانداوە بۆسەر شوێنی جووەکان لەوانە سووتاندنی ئوتومبێلی فریاکەوتن و هەوڵدان بۆ سوتاندنی کەنیشتی جووەکان.