وەزارەتی دەرەوەی ئەمەریکا ڕایگەیاند مارکۆ ڕوبیۆ، وەزیری دەرەوەی ئەمەریکا ڕۆژی چوارشەممە بە کاتی واشنتن لە پەیوەندییەکی تەلەفۆنیدا لەگەڵ مەسرور بارزانی، سەرۆک وەزیرانی هەرێمی کوردستان دوایین پێشهاتە ئەمنی و سیاسییەکانی عێراق و ناوچەکەی تاوتوێ کردووە وپرسە و سەرەخۆشی خۆی ئاراستە کەسوکاری ئەو پێشمەرگانە کردووە کە لە هێرشەکانی ئێراندا گیانیان لەدەستداوە.
تۆمی پیگۆت، جێگری وتەبێژی وەزارەتی دەرەوەی ئەمەریکا ڕاگەیەندراوێکی بڵاوکردووەتەوە و تیایدا ئاماژەی بەوەکردووە کە مارکۆ ڕوبیۆ لەو پەیوەندییەدا هاوخەمی خۆی بۆ کەسوکاری ئەو پێشمەرگانە دەربڕیوە کە لە هێرشە مووشەکییەکەی ئێران لە 24ی مانگی سێدا کوژران و هیوای زوو چاکبوونەوەی بۆ ئەو کەسانەش خواستووە کە لە هێرشەکەدا برینداربوون.
لە ڕاگەیەندراوەکەدا وەزیری دەرەوەی ئەمەریکا، هێرشە بەردەوامەکانی ئێران و میلیشیا عێراقییەکانی سەر بە ئێران، دژی هاووڵاتیانی ئەمەریکایی و ژێرخانی وزە لە عێراق بە توندی شەرمەزار دەکات. دووپاتیشی کردووەتەوە بەردەوامی ئەو هێرشانە هەڕەشەیەکی ڕژدە بۆ سەر سەقامگیریی عێراق و ئاسایشی ناوچەکە.
ڕوبیۆ هەروەها ستایشی ڕۆڵی حکومەتی هەرێمی کوردستانی کردووە لە ئاسانکاریکردنی ڕۆیشتنی هەناردەکردنی نەوتی عێراق- لەنێویاندا نەوتی بەرهەمهێنراو لە هەرێمی کوردستان بۆ بازاڕە جیهانییەکان. وەزارەتی دەرەوەی ئەمەریکا ڕایگەیاندووە واشنتن ئەم هاوکارییە بە گرنگ دەزانێت بۆ ئاسایشی وزەی نێودەوڵەتی و سەقامگیری ئابووری عێراق.
ئەم پەیوەندییە لە کاتێکدایە کە گرژییەکانی نێوان ئێران و ئەمەریکا دوای هێرشە مووشەکییەکانی ئەم دواییە و چالاکییەکانی بریکارەکانی تاران لە عێراق زیادی کردووە. لە هەمان چوارچێوەدا واشنتن جەختی لەسەر پێویستی کارکردن لە نزیکەوە لەگەڵ هەولێر و بەغدا بۆ چارەسەرکردنی هەڕەشە ئەمنییە هاوبەشەکان کردووەتەوە.
ڕوبیۆ لە پەیوەندییەکی تەلەفۆنیدا لەگەڵ مەسرور بارزانی سەرەخۆشی لە کەسوکاری پێشمەرگە کوژراوەکان دەکات
