سکرتێری گشتی ڕێکخراوی ناتۆ، مارک ڕۆتە، لە چاوپێکەوتنێکی تایبەتدا لەگەڵ کەناڵی فۆکس نیوزی ئەمەریکا، پشتیوانی تەواوی خۆی بۆ هێرشە سەربازییەکانی سەرۆک دۆناڵد ترامپ دژ بە ڕژێمی ئێران ڕاگەیاند و گوتی ئەم کارە "زۆر گرنگ و پێویست" بوو بۆ پاراستنی ئاسایشی ئیسرائیل، ئەوروپا و ناوچەکە.
ڕۆتە لە بەرنامەی "فۆکس ئەند فرێندز" دا گوتی هیچ جیاوازییەک لە نێوان ئێمەدا نییە، "ئەوروپییەکان، کەنەدا، مارک کارنی، ئەمەریکا و سەرۆکی ئەمەریکا هەموومان لە پێناو یەکدا کاردەکەین، چونکە هەموو لایەن لە ئەوروپا پشتیوانی ئەوە دەکەن کە ئایەتوڵا عەلی خامەنەیی کوژراوە، بەرنامەی ئەتۆمی لەناوچووە، و بەرنامەی مووشەکی بالستیکی ئێرانیش زۆر لاواز کراوە – ئەمەش مەترسییەکی گەورە بوو بۆ ئەوروپا، ئیسرائیل و تەواوی ناوچەکە".
ڕۆتە گوتیشی ناتۆ و 21 وڵاتی هاوپەیمان لەگەڵ ئەمەریکا هاوکارییەکی گەورەیان کردووە بۆ پاراستنی ناوچەی تەنگەی هورمز و ڕێگەوبانە سەرەکییەکانی بازرگانی جیهانی، لە کاتێکدا ئێران هێرشی مووشەکی کردووەتە سەر شارەکانی ئیسرائیل وەک دیمۆنا و عەراد.
ڕۆتە گوتیشی لە گفتوگۆکانی کەمتر لە هەفتەیەک پێشتر لەگەڵ سەرکردە سەرەکییەکانی ئەوروپا کردوویەتی، پشتیوانی فراوان هەیە بۆ کردارەکانی ترامپ، و وڵاتانی وەک ئەڵمانیا، فەرەنسا و بەریتانیا هاوکاری لۆجستیکی و بنکە سەربازییەکانیان کردووەتە بەردەستی ئەمەریکا.