میدیاکانی ئەمەریکا دەڵێن وەزارەتی جەنگی ئەمەریکا زیاتر هێزی دەریایی و کەشتی جەنگی بۆ ڕۆژهەڵاتی ناوەڕاست دەنێرێت.
ڕۆژنامەی وۆڵ ستریت جۆرناڵ ڕۆژی هەینی لە زاری سێ بەرپرسی ئەمەریکاییەوە بڵاویکردەوە، پیت هێگسێت وەزیری جەنگی ئەمەریکا داواکارییەکی فەرماندەیی ناوەندیی ئەمەریکا (سێنتکۆم)ی پەسەند کردووە، کە بەرپرسە لە هێزەکانی ئەمەریکا لە ڕۆژهەڵاتی ناوەڕاست.
سەرچاوەکان گوتوویانە داواکارییەکە بریتییە لە ناردنی بەشێک لە یەکەیەکی تایبەتی هێزی وەڵامدانەوەی خێرای دەریایی کە بە شێوەیەکی ئاسایی چەندین کەشتی جەنگی و 5 هەزار سەرباز لەخۆدەگرێت.
بەپێی ڕاپۆرتەکە، کەشتی فڕۆکە هەڵگری USS Tripoli کە بنکەکەی لە ژاپۆنە، ئێستا لەگەڵ هێزی دەریایی یاوەری بەرەو ڕۆژهەڵاتی ناوەڕاست دەڕوات. ئەو بەرپرسانە ئاماژەیان بەوەشکردووە، هێزەکانی مارینز لە ئێستاوە لە ڕۆژهەڵاتی ناوەڕاستدان بۆ پشتیوانیکردن لە ئۆپەراسیۆنەکانی پەیوەست بە ئێران.
لەلایەکی دیکەوە، ئاژانسی ئەسۆشیەیتد پرێس بڵاویکردەوە، بەرپرسێکی ئەمەریکایی بە ئاژانسەکەی ڕاگەیاندووە، نزیکەی 2500 هێزی مارینزی و لانیکەم کەشتییەکی هێرشبەری دوورخراوە بەرەو ڕۆژهەڵاتی ناوەڕاست دەچن.
ئەو بەرپرسە کە نەیویست ناوی ئاشکرا بکرێت بۆ گفتوگۆکردن لەسەر پلانە سەربازییە هەستیارەکان، وتی بەشەکانی یەکەی 31ی هێزی تایبەتی وەڵامدانەوەی خێرای دەریایی و کەشتی هێرشبەری یو ئێس ئێس ترابلوس لە ڕۆژهەڵاتی ناوەڕاست جێگیرکراون. ئەم هەنگاوە ئاماژەیە بۆ زیادبوونی بەرچاوی هێزە سەربازییەکان لە ناوچەکەدا.