فەرماندەیی ناوەندی سوپای ئەمەریکا (سێنتکۆم) ڕایگەیاند لە ماوەی کەمتر لە 100 کاتژمێری ئۆپەراسیۆنی تووڕەیی ئەفسانەییەوە، سوپای ئەمەریکا بە بەکارهێنانی زیاتر لە دوو هەزار کەرەستەی سەربازی و تەقەمەنی، نزیکەی دوو هەزار ئامانجی لەنێو ئێران پێکاوە.
براد کوپەر لە گرتەیەکی ڤیدیۆییدا کە ڕۆژی سێشەممە لە تۆڕی کۆمەڵایەتی ئێکس بڵاویکردووەتەوە، وتی "لەئۆپەراسیۆنەکەدا زیاتر لە 50 هەزار سەرباز و 200 فڕۆکەی جەنگی و دوو فڕۆکە هەڵگر و بۆمب هاوێژ لە ئەمەریکاوە بەشدارن، کەرەستەی زیاتریش لە ڕێگادایە."
وتیشی هێزەکانی ئەمەریکا توانیویانە تاکو ئیستا 17کەشتی ئێرانی، لەوانەش ژێردەریایییەک، لەناوببەن و تا ئێستاش هێرشیان کردووەتە سەر نزیکەی دوو هەزار ئامانج لە ئێران.
فەرماندەی سێنتکۆم وتی "ماوەی دەیان ساڵە ڕێژێمی ئێران کەشتیوانی نێودەوڵەتی هەراسان دەکات. ئەمڕۆ یەک کەشتی ئێرانی لە کەنداوی و تەنگەی هورمز و دەریای عوماندا کارناکات."
فەرماندەی سێنتکۆم وتی "سەرنجمان لەسەر بەئامانجکردنی هەر شتێکە کە بتوانێت تەقەمان لێبکات، بەرگری ئاسمانی ئێرانمان بە توندی لاواز کردووە و سەدان مووشەکی بالیستیکی ئێرانی، مووشەک هەڵگر و فڕۆکەی بێفڕۆکەوانمان لەناوبردووە."
ناوبراو هەروەها باسی لەوەش کرد کە ئێران هەتا ئێستا زیاتر لە 500 موشەکی بالیستیکی و زیاتر لە 2 هەزار فڕۆکەی بێفڕۆکەوانی ئاراستە کردووە.
کوپەر گوتی کۆماری ئیسلامی کوێرانە مووشەک و فڕۆکەی بێفڕۆکەوان هەڵدەدات و خەڵکی مەدەنی دەکاتە ئامانج، "هەرچەندە توانای ئێران بۆ بەئامانجگرتنی ئێمە و هاوبەشەکانمان ڕووی لەدابەزینە، ئەمەش لە کاتێکدا هێزی شەڕکەری ئێمە هەتا دێت لە زیادبووندایە."