بەپێی دوایین ڕاپۆرتی ئاژانسی هەواڵی چالاکوانانی مافی مرۆڤ (هرانا)، ژمارەی کوژراوانی ناڕەزایەتییە سەرتاسەرییەکانی ئەم دواییەی ئێران، لانیکەم بۆ 538 کەس بەرزبووەتەوە کە 490 کەسیان خۆپیشاندەر بوون و 48 کەسی دیکەش، ئەندامی هێزە سەرکوتکەرەکان بوون.
هرانا ڕایگەیاندووە کە ناڕەزایەتی لە زیاتر لە 570 شوێن لە سەرانسەری ئێران و لە هەر 31 پارێزگای ئەو وڵاتە بەڕێوەچووە.
ئەم ڕێکخراوەی مافی مرۆڤ هەروەها ڕایگەیاندووە کە لە کاتی ناڕەزایەتییەکاندا زیاتر لە 10 هەزار و 600 کەسی دەستگیرکراون.
بەگوێرەی ڕاپۆرتی هرانا ئەم داتایانە بە پشتبەستن بە تۆڕێک لە چالاکوانانی ناوخۆ و دەرەوەی وڵات کۆکراونەتەوە، بەڵام بە لەبەرچاوگرتنی ئەو گرتە ڤیدیۆییانەی کە دەستیان کەوتووە، ئەگەری زۆرە ئەم ڕێژەیە زیاد بکات.
لە هەمان کاتدا ئەو ڕاپۆرت و گرتە ڤیدیۆییانەی لە سۆشیال میدیادا بڵاودەکرێنەوە، ئاماژەن بۆ بەردەوامیی ناڕەزایەتییە بەربڵاوەکان لە تاران و شارەکانی دیکە لە نێویاندا مەشهەد.
ڕاپەڕینی سەرتاسەری ئێران ڕۆژی یەکشەممە پێی ناوەتە پازدەهەمین ڕۆژی خۆیەوە، ئەمەش لە کاتێکدا بە پێی سەرچاوەکانی مافی مرۆڤ و ئەو گرتە ڤیدیۆییانەی دەست دەنگی ئەمەریکا کەوتوون، سەرکوتی خوێناویی خۆپیشاندەران لە شەقامەکانی شارە جۆربەجۆرەکان ڕوودەدات.