بە هۆی پۆستێک لە سۆشیال میدیا، ڕۆژنامەنوس ئومێد بەرۆشکی لە لایەن هێزێکی ئەمنیەوە دەستگیر دەکرێت، ڕێکخەری سەنتەری میترۆش ڕایدەگەیەنێت، زۆربەی ڕۆژنامەنوسان ڕۆژانی پێنجشەممە دەستگیردەکرێن تاوەکو ڕۆژی یەکشەممە لە کونجی زیندان بمێننەوە و دواتر دادوەر بڕیاریان لە باریەوە بدات ئەمەش پێشلکاریە."
ڕەحمان غەریب ڕێکخەری سەنتەری میترۆ بە دەنگی ئەمەریکای ڕاگەیاند،" ئومید بەرۆشکی یەکێکە لە قەڵەم بەدەست و ئازاکانی سنوری بادینان، هەمیشە دژی دەسەڵات دەوەستێتەوە، بەیانی ئەمڕۆ لەلایەن هێزێکی ئەمنیەوە بە تۆمەتی ئەوەی پۆستێکی لە سۆشیال میدیا کردووە دەستگیردەکرێت."
ڕێکخەری سەنتەری میترۆ، وتیشی،" لە 23 ی ئەم مانگە هەواڵێکی بڵاوکردووتەوە کە مەلا نەزیر بەرواری یەکێکە لە زیندانیان بادینان و سزاکەی تەواو دەبێت، بەڵام دواتر لە چاکسازی نامێنێت و دەبرێتە ئاسایش، ئومێدیش ئەم هەواڵەی داناوە و وتوویەتی ڕفێنراوە."
بە پێی بە دواداچوونەکانی دەنگی ئەمەریکا، ئومێد لە سەر ئەو پۆستەی کە بڵاویکردووەتەوە چاکسازی سکاڵایان لەسەر تۆمارکردووە و دوای دەستگیرکردنی ئەمڕۆ 22ی مانگی دوو، براوەتە بنکەی پۆلیسی بەرۆشکی و دواتر بۆ بنکەی پۆلیسی مەڵتا و لەوێشەوە بۆ چاکسازی زڕکا و دەستبەسەرە تا ڕۆژی یەک شەممەی داهاتوو کە دادوەر دەیبنێت.
ڕەحمان غەریب باسی لەوەشکرد،" بە تۆمەتی خراپ بەکارهێنانی ئامێرەکانی پەیوەندیکردن ئەو ڕۆژنامەنوسەی سنوری بادینان دەستگیرکراوە، لە کاتێکدا ڕۆژنامەنوسە و دەبوایە بە پێی یاسای ڕۆژنامەگەری مامەڵەی لەگەڵدا بکرێت، بۆیە ئەم دەستگیرکردنە تۆڵەکردنەوەیە و داویان بۆی داناوە تا بێدەنگی بکەن."
سەنتەری میترۆ لە بەیاننامەیەکدا دەستگیرکردنی ئەو ڕۆژنامەنوسە ڕەتدەکەنەوە و بە پێشێلکاری ئاشکرایی بەندەکانی مافی مرۆڤی نێودەوڵەتی و یاسا کارپێکراوەکانی هەرێمی کوردستان کە ئازادی دەربڕین ناو دەبەن و داوای دەست بەجێ ئازادکردنی دەکەن.