جەیک سولیڤان، ڕاوێژکاری ئاسایشی نیشتمانی ئەمەریکا ڕۆژی چوارشەممە لە پەراوێزی کۆڕبەندی ئابوری جیهان لە داڤۆسی سویسرا چاوی بە مەسرور بارزانی سەرۆک وەزیرانی هەرێمی کوردستان کەوت.
لەڕاگەیەندراوێکدا کۆشکی سپی دەڵێت " سولیڤان بە توندی ئیدانەی هێرشە مووشەکییە بالیستیکییە شەڕانگێزییەکانی ئێرانی کرد بۆ سەر شاری هەولێری پایتەختی هەرێمی کوردستان، و پرسە و سەرەخۆشی خۆی ڕاگەیاند بۆ گیانلەدەستدانی تراژیدیای چوار کەسی سڤیل لەم هێرشانە، لە ناویاندا منداڵێکی کەمتر لە یەک ساڵ."
کۆشکی سپی دەشڵێت سولیڤان و بارزانی هەروەها باسیان لە گرنگی "دەستپێکردنەوەی هەناردەکردنی نەوت و پاراستنی شایستە داراییەکان لە عێراقی فیدراڵیەوە بۆ هەرێمی کوردستان کرد بۆ پشتیوانیکردن لە سەقامگیری و بژێوی لە هەرێم."
جەیک سولیڤان سوپاس و پێزانینی خۆی دەربڕی بۆ هاوبەشی بەهێزی هەرێمی کوردستانی لەگەڵ ویلایەتە یەکگرتووەکانی ئەمەریکا و پشتیوانی ئەمەریکاشی دووپاتکردەوە.
شەوی دووشەممە لەسەر سێشەممە سوپای پاسدارانی ئێران بە بیانوی بوونی بنکەی مۆساد لە هەولێر، هێرشی مووشەکی کردە سەر پایتەختی هەرێمی کوردستان و لە ئەجامدا 4 کەسی سڤیل کوژران و ژمارەیەکیش بریندار بوون.
ئەم هێرشە لەلایەن حکومەتی هەرێم و حکومەتی ناوەندی عێراقەوە سەرکۆنە کراوە و چەندین وڵاتانی جیهانیش هێرشەکەیان شەرمەزار کردووە.
