لە ڕۆژی جیهانی بەرەنگاربوونەوەی توندوتیژی دژ بە هاوڕەگەزخوازاندا نەتەوە یەکگرتووەکان دەڵێت هەر هێرشێک بۆ سەر ئەندامێکی کۆمەڵگەی هاوڕەگەزخوزان (LGBTQI) هێرشێکە بۆ سەر مافەکانی مرۆڤ.
سکرتێری گشتی نەتەوە یەکگرتووەکان ئەنتۆنیۆ گۆتێرێش دەڵێت " لە هەموو گۆشەیەکی جیهاندا، خەڵکی +LGBTQI بەردەوام ڕووبەڕووی توندوتیژی، گۆشەگیری، لێدوانی پڕ ڕق و کینە، نادادپەروەری و تەنانەت ڕاستەوخۆ کوشتنیش دەبنەوە. هەر هێرشێک بۆ سەر خەڵکی LGBTQI+ هێرشکردنە سەر مافەکانی مرۆڤ و ئەو بەهایانەیە کە ئێمە لامان کرنگە. ناتوانین و بەرەو دواوە ناگەڕێینەوە."
دروشمی ئەمساڵی نەتەوە یەکگرتووەکان بۆ ڕۆژی بەرەنگاربوونەوەی توندوتیژی دژ بە هاوڕەگەزخوازان ئەمەیە؛ هەمیشە پێکەوە: یەکگرتوو لە هەمەچەشنییدا.
لەم ڕۆژەدا کۆمەڵێک کار و چالاکی دەکرێت کە تیایدا تیشک دەخرێتە سەر توندوتیژی و جۆرەکانی جیوازی کردن کە هاوڕەگەزخوازن ڕووبەڕووی دەبنەوە.
گۆتێرێش لە بەیاننامەکەیدا داواکاری لە هەموو وڵاتانی ئەندامی نەتەوە یەکگرتووەکان دووپات کردووەتەوە "پابەندبن بە جاڕنامەی جیهانی مافەکانی مرۆڤ و کۆتاییبهێنن بەوەی پەیوەندی هاوڕەگەزەکان بە تاوان دابنێن." ئەو گوتیشی هەرگیز نابێت دەربڕینی ڕاستی خۆت تاوانبێت.
وەزارەتی دەرەوەی ئەمەریکا دەڵێت " ویلایەتە یەکگرتووەکانی ئەمەریکا بەردەوامە لە کارکردن لەگەڵ حکومەتەکانی سەرانسەری جیهان و خەباتکارانی کۆمەڵگەی سیڤیل بۆ بەرەوپێشبردنی مافی مرۆڤی LGBTQI+ ."
ڕێکخراوی لێخۆشبوونی جیهانیش پارچە ڤیدیۆیەکی بڵاوکردووەتەوە کە تیایدا تیشک دەخاتە سەر مافەکانی هاوڕەگەزخوازان و دەڵێت " ئەمڕۆ و هەموو ڕۆژێک مافەکانی LGBTQI مافەکانی مرۆڤن."
هاوپەیمانی ناتۆش دەڵێت " ئەرکی ناتۆ لە پاراستنی خاکەکان زیاتر و پاراستنی دانیشتوانی جۆراجۆریشە."