نێردەی ئەمەریکا لە نەتەوە یەکگرتووەکان لە کۆبوونەوەی ئەنجومەنی ئاسایشدا سەبارەت بە شەڕی ڕووسیا بۆ سەر ئۆکرانیا گوتی "جاڕنامەی نەتەوە یەکگرتووەکان دژی هەڕەشە و بەکارهێنانی هێزە و کار بۆ پێشخستنی مافەکانی مرۆڤ و ئازادییە بنەڕەتییەکان دەکات."
لیندا تۆماس گرینفیڵد گوتی "لە مانگی یەکی ساڵی ٢٠٢٢دا، کۆبوونەوەی بەپەلەمان ئەنجامدا، لەوانەش لە ڕێکخراوی ئاسایش و هاوکاری لە ئەوروپا و لە ئەنجومەنی ناتۆ-ڕووسیا و ئامانجەکەشمان لە کۆبوونەوەکان ئەوە بوو کە لایەنەکان لە ڕێگەی دیالۆگ و دیپلۆماسییەوە نیگەرانییەکانیان چارەسەر بکەن، بەڵام ڕووسیا ڕێگایەکی جیاوازی هەڵبژارد و سەرۆک پوتین بڕیاریدا دڵی جاڕنامەی نەتەوە یەکگرتووەکاندا بکاتە ئامانج و ڕاست لەو کاتەی ئێمە لە ئەنجومەنەکەدا کارمان بۆ پاراستنی ئاشتی دەکرد، ئەو شەڕی هەڵبژارد."
نێردەی ئەمەریکا لە نەتەوە یەکگرتووەکان ئەوەشی زیادی کرد و گوتی "هەروەک چۆن لە مانگی یەکی ساڵی ڕابردوودا ئەنجومەنی ئاسایشمان ئاگادار کردەوە کە ڕووسیا پلانی لەشکرکێشییەکی تەواوی بۆ سەر ئۆکرانیا هەیە، لەم دواییانەشدا هۆشداریمان بە ئەنجومەنەکە داوە کە ئێران و کۆریای باکوور پلانیان هەیە کەلوپەلی قەدەغەکراو بۆ ڕووسیا بگوازنەوە."
لیندا تۆماس گرینفیڵد هەروەها گوتی " ئێران لە مانگی ٨وە بە پێشێلکردنی بڕیارنامەی ٢٢٣١ی ئەنجوومەنی ئاسایش سەدان فڕۆکەی بێفڕۆکەوانی بۆ ڕووسیا گواستووەتەوە و ڕووسیاش ئەم فڕۆکە بێفڕۆکەوانانە بۆ هێرشکردنە سەر ژێرخانی وزەی ئۆکرانیا بەکاردەهێنێت."
ناوبراو گوتیشی پێدەچێت ئێران خەریکی پێداچوونەوە دەکات بۆ فرۆشتنی سەدان مووشەکی بالیستیکی بە ڕووسیا و دەشڵێت "ئێمە دەمانەوێت ئێران بڕیاری خۆی بگۆڕێت و ئەو کارانە نەکات و پێویستە وڵاتانی دیکەش ڕێگری لەم کارەی کۆماری ئیسلامی بکەن."
سەرچاوە/ ماڵپەڕی نێردەی ئەمەریکا لە نەتەوە یەکگرتووەکان