بەپێی ئامارە سەرەتاییەکانی وەزارەتی نەوتی عێراق داهاتی نەوتی عێراق لە ساڵی 2022دا 115 ملیار دۆلاری تێپەڕاندووە، ئەمەش بەرزترین ئاستی چوار ساڵی ڕابردووە لە پاش داڕمانی نرخەکان لە سەردەمی پەتای کۆرۆنادا.
بەرهەمهێنانی نەوت نزیکەی لەسەدا 90ی داهاتی عێراق پێکدەهێنێت و وڵاتەکە دووهەم گەورەترین بەرهەمهێنەرە لە چوارچێوەی ڕێکخراوی وڵاتانی هەناردەکاری نەوت (OPEC) .
هەیان عەبدولغەنی وەزیری نەوتی عێراق لە بەیاننامەیەکدا ڕۆژی سێشەممە ڕایگەیاند، "کۆی داهاتی هەناردەکردنی نەوتی خاو بۆ ساڵی 2022 زیاترە لە 115 ملیار دۆلارە".
بەگوێرەی ڕاگەیەندراوەکە، لە ساڵی 2022دا عێراق زیاتر لە یەک ملیار و 200 ملیۆن بەرمیل نەوتی هەناردەی دەرەوە کردووە، بە گشتی 3.3 ملیۆن بەرمیل لە ڕۆژێکدا.
ئەم داهاتە لە پاش بەرزبوونەوەی نرخەکانە بەهۆی شەڕی داگیرکاری ڕووسیا لە ئۆکرانیا و پاشانیش دوو دڵی ئۆپیک لە زیادکردنی بەرهەمەکان.
بەپێی ئامارە فەرمییەکان، داهاتی نەوت لە ساڵی 2019دا 78 ملیار و 5 ملیۆن دۆلار بوو. لە ساڵی 2020 دا داهاتەکە دابەزی بۆ 42 ملیار دۆلار و لە ساڵی 2021دا جارێکی تر بەرزبووەو بۆ 75 ملیار و 6 ملیۆن دۆلار.
دوابەدوای دەیان ساڵی ململانێ، عێراق ڕووبەڕووی ئاستەنگە ئابوورییە درێژخایەنەکان بووەتەوە و پێویستی بە وەبەرهێنانی بەرچاو هەیە لە پرۆژەکانی ژێرخانی ئابووریدا، ئەمەش وایکردووە داهاتی نەوت و نرخی هەر بەرمیلێک داتایەکی چارەنووسساز بێت بۆ ئامادەکردنی بودجەی ساڵانەی بەغدا.
سەرەڕای ئەوەی کە عێراق وڵاتێکی دەوڵەمەند بە نەوتە، قەیرانی وزەی هەیە و بە بەردوامی کێشەی کارەبای هەیە بۆ یەک لەسەر سێی گازی وڵاتەکەی پشت بە ئێران دەبەستێت.
مانگی ڕابردوو بانکی نێودەوڵەتی هۆشداریدا لەوەی عێراق کە بەهۆی کاریگەرییەکانی گۆڕانی کەشوهەوا لە وشکەساڵیەوە بگرە هەتا کەمی ئاو و بەرزبوونەوەی پلەکانی گەرما زیانی بەرکەوتووە، دەبێت ئابوورییەکەی هەمەچەشن بکات و تا ساڵی 2040، 233 ملیار دۆلار وەبەرهێنان بکات بۆ ئەوەی "رێڕەوی گەشەسەندنی سەوز" دەستپێبکات.