جۆو بایدن ڕۆژی چوارشەممە لە ساڵیادی مردنی جۆرج فلۆید لەژێر دەستی پۆلیسێک فەرمانێکی جێبەجێکاری دەرکرد.
بەپێی فەرمانەکەی بایدن هێزی پۆلیسی فیدراڵی دەبێت سەرلەنوێ پێداچوونەوە بە سیاسەتەکانی بەکارهێنانی هێز بکاتەوە و بنکەیەکی زانیاری دروست بکات بۆ ئەو پۆلیسانەی کە بەهۆی هەڵسوکەوتی نادروستەوە لە کارەکانیان دوورخراونەتەوە. هەروەها بە پێی فەرمانەکە بەکارهێنانی دەست و ملی تاوانباران لەلایەن پۆلیسی ناوچەیی و ویلایەتەکانەوە سنووردار کراوە.
سەرۆکی ئەمەریکا دوای واژۆکردنی فەرمانەکە بە میدیاکانی گوت "ئەمە پێوەرێکە بۆ ئەوەی پێکەوە کارێک بۆ چاکبوونەوەی ڕۆحی نەتەوەکەمان بکەین بۆ چارەسەرکردنی ئەو زەبر و زەنگ و ترس و ماندوێتییە قووڵەی کە هەموو مرۆڤەکانی ئەم وڵاتە بەتایبەتی ڕەشپێستەکان بۆ چەندین نەوە ئەزموونیان کردووە".
بایدن ئاماژەی بە تەقەکردنە دڵتەزێنەکەی قوتابخانەی سەرەتایی لە ویلایەتی تەکساس و کوژرانی منداڵان و مامۆستایانی بێتاوان کرد و گوتی "کۆنگرێس بوێری ڕووبەڕوو بوونەوەی لەگەڵ لۆبییە بەهێزەکانی چەک نییە و هەروەها کۆمارییەکان دژی سنووردارکردنی توندن بۆ خاوەندارێتی چەک."
فلۆیدی ڕەشپێست، لە مانگی 5 ی ساڵی 2020 گیانی لەدەستدا کاتێک دێرک شۆڤین، ئەفسەری پێشووی پۆلیس ئەژنۆی لەسەر ملی دانابوو بۆ زیاتر لە 9 دەقە.
کوشتنی فلۆید بە کامێرای مۆبایل گیرابوو و بڵاوبۆوە ئەمەش بووە هۆی خۆپیشاندانی ناڕەزایی لە سەرانسەری جیهاندا دژ بە ڕەگەزپەرستی و توندوتیژی پۆلیس بە تایبەتی لە وڵاتە یەکگرتووەکانی ئەمەریکادا.