Accessibility links

کاربەدەستێکی ئێرانی لە ئەوروپا بە تاوانی تیرۆر سزای 20 ساڵ زیندانیکردن دەدرێت


ئەسەدوڵا ئەسەدی دیپلۆماتێکی کۆماری ئیسلامی ئێران ڕووبەڕووی 20 ساڵ زیندان دەبێتەوە و پارێزەرانی دەڵێن کە ناوبراو داوای پێداچوونەوەی بۆ سزاکەی ڕەتکردوەتەوە. ئەمە یەکەمجارە لەدوای شۆڕشی کۆماری ئیسلامییەوە کاربەدەستێکی ئەو وڵاتە لەئەوروپا بەتۆمەتی پەیوەندیدار بەتیرۆر لەئەوروپا سزا بدرێت.

پارێزەری ئەسەدوڵا ئەسەدی ڕۆژی چوارشەممە 5 ی مانگی پێنج لە شاری ئەنتورپی بەلجیکا بە پەیامنێرانی ڕاگەیاند ، ئەسەدی داوای پێداچوونەوەی بۆ سزاکەی ڕەتکردوەتەوە چونکە پێی وابوو " هەر لەسەرەتاوە دادگایەکی سیاسییە و چیتر ناخوازێت بەشداری پرۆسەکە بکات " .

لە 4 ی مانگی پێنجی ساڵی 2021 دادگای بەلجیکا ئەسەدی بە تاوانی پلاندانان بۆ کردەوەیەکی تیرۆریستی تۆمەتبار کرد و سزای 20 ساڵ زیندانی کردنی بۆ دەرکرد. بەپێی بەڵگەکان، ساڵی 2018 ناوبراو پلانی تەقینەوەی لە گردبوونەوەیەکی موجاهیدنی خەلقدا لە نزیک پاریس داڕشتووە کە چەندین کەسایەتی ئەمەریکایش وەک ڕوودی جولیانی، سەرۆکی پێشووی شاری نیویۆرک، ئامادەی گردبوونەوەکە بوون. پێشتر ئەسەدی داوای پێداچونەوەی بۆ سزاکەی کردبو، بەڵام رۆژی چوارشەممە پارێزەرەکەی لە شاری ئەنتورپی بەلجیکا ڕایگەیاند کە ئەسەدی لە داواکەی پاشگەز بووەتەوە.

باڵیۆزخانەی ئێران لە برۆکسل سەرەڕای ڕەتکردنەوەی بڕیارەکە ڕایگەیاند کە " ئێران مافی خۆی دەپارێزێت وهەموو میکانیزمێکی یاسایی بەکار دەهێنێت لەو پێناوەدا، لەوانە پرۆتۆکۆڵی پەیماننامەی ڤیەنا لەسەر چارەسەری ناکۆکییەکان."

لە سزاکەی دادگای بەلجیکا پارێزبەندی دیپلۆماسیی ئەسەدی ڕەتکراوەتەوە و دادگاکە ڕایگەیاندوە کە ئەو پارێزبەندییە چالاکی تێرۆریستی لەخۆ ناگرێت.

داواکاری گشتی ئەوەشی گوتووە کە حکومەتی بەلجیکا گەرەنتی ئەوەی داوە کە هیچ ئاڵوگۆڕێکی زیندانی بۆ ئەسەدی ئەنجام نادرێت، چونکە دەسەڵاتی دادوەری ئەو وڵاتە سەربەخۆیە لە بڕیاری سیاسی.

ئەسەدی لە ئەڵمانیا دەستگیرکرا و دواتر ڕادەستی بەلجیکا کرا بە هۆی ئەوەی دوو هاودەستە ئێرانییەکەی هاوڵاتی و دانیشتووی ئەو وڵاتەن.

دادگای بەلجیکا ڕایگەیاندووە کە ئەسەدی تۆڕێکی هەواڵگریی دەوڵەتی کۆماری ئیسلامی بەڕێوەبردوە و لە تارانەوە فەرمانی وەرگرتوە. بە گوێرەی ئەو دادگایە، ئەسەدی وەک دیپلۆماتکارێک زۆر بە ئاسانی تەقەمەنی لە تارانەوە بردووە بۆ ڤیەنا و دواتر لەوێ ڕادەستی هاودەستەکانی خۆی کردووە.

دۆسیەکە تۆمەتباری دیکەشی هەیە، ئەمیر سەعدوونی و نەسیمە نەعامی ژن و مێردێکی بەلجیکا -ئێرانین کە هاوکاری ئەسەدی یان کردوە. میهرداد عارفانی تۆمەتباری دیکەی دۆسیەکەیە کە هەر سێ بە 15 بۆ 18 ساڵ حوکمدراون.

XS
SM
MD
LG