مه‌راسیمی تایبه‌ت سـازده‌کرێن بۆ به‌رزڕاگرتنی گیانی قوربانیـیانی 11 ی سێپته‌مبه‌ر

له‌ سـاڵیادی هێرشه‌ تێرۆرسـتیـیه‌کانی 11 ی سـێپته‌مبه‌ر، ئه‌وانه‌ی له‌ سـاڵی 2001 کرانه‌ سه‌ر وڵاته‌ یه‌کگرتووه‌کانی ئه‌مه‌ریکا، ڕێوڕه‌سمی تایبه‌ت بۆ یادکردنه‌وه‌ی قوربانیـیانی ئه‌و هێرشانه‌ له‌ واشنتنی پایته‌خت و نیویۆرک و په‌نسلڤانیا سـازکران.
له‌ شـاری نیویۆرک هاوڕێ و که‌سوکاری قوربانیـیه‌کان له‌ شوێنی جووته‌ تاوه‌ره‌‌ به‌رزه‌که‌ی ناوه‌ندی بازرگانی جیهانی گردبوونه‌وه‌ که‌ له‌ هێرشه‌کاندا به‌ سه‌دان که‌سی ناوی داڕمان.
هێرشه‌کان که‌ له‌ لایه‌ن ڕێکخراوی تێرۆرستی ئه‌لقاعیده‌وه‌ پـیلانڕێژی بۆ کرابوو، بوونه‌ مایه‌ی گیان له‌ده‌سـتدانی نزیکه‌ی 3 هه‌زار که‌س.
له‌ واشنتن، سه‌رۆک براک ئۆباما و خانمی یه‌که‌م میشێل ئۆباما له‌گه‌ڵ جۆ بایدنی جێـگری سه‌رۆک و جیڵی هاوسه‌ری و ژماره‌یه‌کی زۆری که‌سایه‌تیـیه‌کان له‌ کاژمێر 8:35 ی به‌یانی له‌ چیمه‌نی کۆشـکی بۆ سـاتێـک به‌ بێ ده‌نگی وه‌سـتان، له‌ هه‌مان ئه‌و کاته‌ی 12 سـاڵ له‌مه‌وبه‌ر فڕۆکه‌ی ڕفێندراوی یه‌که‌م به‌ یه‌کێـک له‌ جوته‌ تاوه‌ره‌که‌ کێشـرا.
پاشـان سه‌رۆک ئۆباما له‌ ڕێوڕه‌سـمی به‌رده‌م وه‌زاره‌تی به‌رگری(په‌نتاگۆن) به‌شـداریکرد له‌گه‌ڵ که‌سوکاری زیاتر له‌ 100 قوربانی هێرشه‌که‌ی سه‌ر باره‌گای وه‌زاره‌ته‌که‌.
سه‌رۆک ئۆباما گوتی" نوێژ و نزا بۆ گیانی ئه‌و نزیکه‌ی 3 هه‌زار قوربانیـیه‌ بێ گوناهه‌ ده‌که‌ین که‌ هێشـتا دڵمان بۆیان به‌ ئازاره‌."
له‌ شـاری شانکه‌شڤیلی ویلایه‌تی په‌نسلڤانیاش ڕێوڕه‌سمێـک سـازکرا بۆ به‌رزڕاگرتنی گیانی 33 سه‌رنشین و 7 که‌سی تاقمی فڕۆکه‌که‌ی له‌ نزیک ئه‌و شـاره‌دا که‌وته‌ خوارێ، کاتێـک سه‌رنشینه‌کانی ڕووبه‌ڕووی ڕفێنده‌ره‌ تێرۆرسته‌کان بوونه‌وه‌.