سه‌رۆک ئۆباما: ته‌قینه‌وه‌کانی بۆستن کاری تێرۆرستی بوون

سه‌رۆکی وڵاته‌ یه‌کگرتووه‌کانی ئه‌مه‌ریکا براک ئۆباما ده‌ڵێت ده‌زگای لێـکۆڵینه‌وه‌ی فیدراڵی ئه‌مه‌ریکا FBI لێـکۆڵینه‌وه‌ له‌ هه‌ردوو ته‌قینه‌وه‌ کوشـنده‌که‌ی ڕۆژی دووشه‌ممه‌ی بۆستن ده‌کات و به‌ کارێـکی تێرۆرستی ناوی ده‌بات.
سه‌رۆک ئۆباما ئه‌مڕۆ سێشه‌ممه‌ له‌ کۆنگره‌یه‌کی ڕۆژنامه‌وانیدا له‌ کۆشکی سـپـی گوتی هێرشه‌که‌ کارێـکی نامه‌ردانه‌ و دڕندانه‌ بوو. گوتیشی هێشـتا کاربه‌ده‌سـتان نازانن کێ هێرشه‌که‌ی ئه‌نجامداوه‌ و بۆچی.
کاربه‌ده‌سـتێـکی ده‌زگای دژه‌ تێرۆر ده‌ڵێت بۆمبه‌کان له‌ مه‌نجه‌ڵی زووپه‌ز (مه‌نجه‌ڵی بوخار) دروسـتکرابوون و پارچه‌ ئاسن و ساچمه‌ و بزمار خرابووه‌ ناویان.