Accessibility links

سه‌رۆکی سوریا هێرش ده‌کاته‌ سه‌ر تورکیا و ئوردن


به‌شار ئه‌لئه‌سه‌د سه‌رۆکی سوریا ده‌ڵێت ڕه‌جه‌ب ته‌یب ئه‌ردۆغان سه‌ره‌ک وه‌زیری تورکیا درۆ ده‌کات سه‌باره‌ت به‌ سه‌رهه‌ڵدانی گه‌لی سوریا.

له‌ لێدوانێکدا بۆ ژماره‌یه‌ک ڕۆژنامه‌وانانی تورکیا له‌ هه‌فته‌ی ڕابردوودا و ڕۆژی هه‌ینی له‌ ته‌له‌فزیۆنه‌کانه‌وه‌ په‌خشکرا، سه‌رۆکی سوریا گوتوویه‌تی تورکیا و شانشینی ئوردون یاری به‌ ئاگر ده‌که‌ن له‌و ڕوانگه‌یه‌وه‌ی مه‌شق و ڕاهێنان به‌ یاخیبوانی سوریایی ده‌که‌ن له‌ ناو وڵاته‌کانیاندا.

به‌شار ئه‌لئه‌سه‌د ، سه‌ره‌ک وه‌زیری تورکیاشی به‌ کارکردن له‌گه‌ڵ ئیسرائیلدا گوناهبارکردووه بۆ وێرانکردنی سوریا و ده‌شڵێت ئانکه‌ره‌ به‌شداری ڕاسته‌وخۆی هه‌یه‌ له‌ کوشتنی سوریاییه‌کاندا.

تورکیا و شانشینی ئوردونیش داڵده‌ی سه‌دان هه‌زار په‌نابه‌ری سوریاییان داوه‌ که‌ له‌ شه‌ڕی ناوخۆی وڵاته‌که‌ ڕایانکردووه‌.

ڕۆژی هه‌ینیش سه‌رهه‌ڵداوانی سوریا ڕایانگه‌یاندووه ده‌ستیان گرتووه‌ به‌سه‌ر ‌ بنکه‌یه‌کی پشکنیندا له‌سه‌ر ڕێگه‌ی سه‌ره‌کی دیمه‌شق – ئوردون.

سه‌رکرده‌یه‌کی سه‌رهه‌ڵداوان به‌ ئاژانسی ده‌نگ و باسی ڕۆیته‌رزی گوتووه‌ بنکه‌ی پشکنینی ئومول مه‌یثه‌م شوێنێکی سه‌ره‌کی له‌شکرییه‌ و ده‌شڵێت له‌ ئێستادا سه‌رهه‌ڵداوان کۆنترۆڵی هێڵی په‌ڕینه‌وه‌ی سنوریشیان کردووه‌ و به‌و هۆیه‌شه‌وه‌ ڕێگه‌ی ناردنی چه‌کیان بڕیوه‌.

ئه‌مڕۆش شه‌ممه‌ وه‌زاره‌تی ده‌ره‌وه‌ی ئیتالیا ڕایگه‌یاندووه‌ 4 ڕۆژنامه‌وانی ئیتالی له‌ سوریا گیراون.

له‌و ڕاگه‌یاندنه‌دا هاتووه‌ وه‌زاره‌تی ده‌ره‌وه‌ی ئیتالیا له‌ په‌یوه‌ندیدایه‌ له‌گه‌ڵ که‌س و کاری ڕۆژنامه‌وانه‌‌کاندا ، به‌ڵام باسی له‌وه‌ نه‌کردووه‌ کێ ڕۆژنامه‌وانه‌کانی ده‌ستگیر کردووه‌ و زانیاری زیاتریشی نه‌داوه‌ له‌سه‌ر ئه‌و نیگه‌رانیانه‌ی به‌رامبه‌ر پارێزراوی ڕۆژنامه‌وانه‌کان هه‌ن.
XS
SM
MD
LG