بریکاری باڵیۆزخانەی ئەمەریکا لە لیبیا دەڵێت وڵاتەکەی لە پشتیوانیکردنی لیبیا بەردەوام دەبێت و لەوەتای ڕژێمی موعەممەر قەزافی لە ساڵی 2011 وە لادراوە، ئەمەریکا 635 ملیۆن دۆلاری بۆ پشـتیوانیکردنی لیبیا خەرجکردووە.
خانم ستیفانی ولیەمز لە بەیانـنامەیەکدا لەسەر ماڵپەڕی باڵیۆزخانەی وڵاتەکەی نووسیویەتی ڕۆژی پـێنجشەممە خۆی و جەنەڕاڵ تۆماس ڤالدهاوزەر فەرماندەی هێزەکانی ئەمەریکا لە ئەفریکا لەگەڵ فایز ئەلسەڕاج سەرۆک وەزیری لیبیا لە تەرابلوس کۆبوونەتەوە و دووپاتیانکردووەتەوە کە ئەمەریکا دەیەوێت لیبیایەکی سەقامگیر و دیموکرات و یەکگرتوو ببینێت کە تیایدا خۆشگوزەرانی بۆ خەڵکی لیبیا بێتەدی. جەختیشیان لەوە کردووەتەوە واشنتن وابەستەیە بە پەرەپـێدانی ئابوری لەگەڵ لیبیا و شکستهێنان بە داعش و گروپە تێرۆرستیـیەکانی دیکەی بوونەتە مایەی هەڕەشە بۆ سەر ئاسایش و سەلامەتی خەڵکی لیبیا.
Chargé d’Affaires Stephanie Williams & AFRICOM Commander Gen. Thomas Waldhauser met today with PM Fayez Al-Sarraj in #Tripoli. Their visit reinforced the strength of our bilateral relationship & reiterated U.S. support to the GNA and the Libyan people. https://t.co/dsBqGCtkuf pic.twitter.com/VwDBvsZXgi
— U.S. Embassy - Libya (@USAEmbassyLibya) May 31, 2018
هەروەها نووسیویەتی واشنتن یارمەتیـیەکانی بۆ لیبیا زیادکردووە بە ئامانجی باشکردنی ئاسایشی فڕۆکەخانەکان و سنوورەکان و پاراستنی سیستەم و بەڕێوەبردنی زیندانەکان و بەهێزکردنی توانای لیبیا لە بواری هەڵگرتنەوەی مین. جگە لەمانەش بەشداری کردووە لە یارمەتیـیە مرۆیـیەکان و گەڕاندنەوەی سەقامگیری بۆ لیبیا.
پاشان لە کۆنگرەیەکی ڕۆژنامەوانی لە پاش کۆبوونەوەی ، پـشتیوانی واشنتنی بۆ غەسان سەلامە نێردراوی تایبەتی نەتەوە یەکگرتووەکان بۆ لیبیا نیشان دا و داوایکرد لە زووترین کات هەڵبژاردن سازبکرێت. جەنەڕاڵ تۆماسیش گوتی ئەمەریکا بە هەماهەنگی لەگەڵ حکومەتی لیبیا بەردەوام دەبێت لە ڕاوەدونانی تێرۆرستان لە لیبیا.