بەپێی بەڵگەنامەیەک کە کۆمەڵگەی کاری حکومی ئیماڕات بڵاویکردۆتەوە ئیماڕات فەرمانی کردووە بە ڕاگرتنی پێدانی ڤیزا بە هاوڵاتیانی 13 وڵات کە زۆرینەی هاوڵاتیانی ئەو وڵاتانە موسوڵمانن، لەوانەش ئێران و سوریا و ئەفغانستان و پاکستان.
سەرچاوەیەک نزیک لە بابەتەکەوە وتی ئیماڕات بەهۆی هۆکاری ئەمنیەوە بەشێوەیەکی کاتی پێدانی ڤیزای بە هاوڵاتیانی ئەفغانستان و پاکستان و کۆمەڵێک وڵاتی دیکەی ڕاگرتووە، بەڵام هیچ وردەکارییەک لەسەر هۆکارە ئەمنیەکان نەخراوەتەڕوو.
بەڵگەنامەکە کە بەسەر کۆمپانیاکانی سەر بە کۆمەڵگەکەدا دابەشکراوە و بەردەست ڕۆیتەرز کەوتووە ئاماژە بە نوسراوێک دەدات لە بەڕێوبەرایەتی کۆچەوە و لە 18 ی مانگی یانزەوە کار بەو نوسراوە دەکرێت.
هەروەها ئەوەش دەخاتە ڕوو داواکردنی ڤیزای کار یاخود سەردان لەلایەن هاوڵاتیانی ئەو 13 وڵاتەوە ڕاگیراوە کە هەریەک لە سۆماڵ و یەمەن و لیبیاش دەگرێتەوە.
دەشڵێت ڕاگرتنی پێدانی ڤیزا هاوڵاتیانی جەزائیر و کینیا و عێراق و لوبنان و تونس و تورکیاش دەگرێتەوە.
سەرچاوە/ ڕۆیتەرز