ڕۆژی سێشەممە پەرلەمانتارانی تورکیا لە دانیشتنێکی داخراودا تاوتوێی پەرەسەندنی جەنگەکەیان کرد لە ڕۆژهەڵاتی ناوەڕاستدا، ئەمەش هەفتەیەک دوای ئەوەی سەرۆکی تورکیا ڕەجەب تەیب ئەردۆغان بانگەشەی ئەوەی کرد کە ئیسڕائیل دواجار ئامانجی ئەوەیە دەستدرێژی بکاتە سەر خاکی تورکیا.
ئیسڕائیل بە ئاشکرا وەڵامی بانگەشەکەی ئەردۆغانی نەداوەتەوە، کە شڕۆڤەکاران و پەرلەمانتارانی ئۆپۆزسیۆن دەڵێن ئەوە ڕێی تێناچێت و ئامانج لەو بانگەشەیە بە تایبەتی ئەوەیە کە سەرنجی خەڵکەکە لاببات لەسەر قەیرانە ئابوورییەکەی تورکیا.
ئیسڕائیل لێدوانیشی نەداوە لەسەر کۆبوونەوە داخراوەکەی ڕۆژی سێشەممەی پەرلەمانی تورکیا کە بە " داگیرکاری ئیسڕائیل لە لوبنان و پەرەسەندنەکان لە ناوچەکەدا " ناسراوە.
سەرۆکی پەرلەمانی تورکیا نومان کورتولموس وتوویەتی وەزیرانی دەرەوە و بەرگری تورکیا لە دانیشتنە داخراوەکەدا قسە دەکەن لەسەر مەترسییەکانی جەنگەکانی ناو غەززە و لوبنان و فراوانتربوونییان، دانیشتنەکە لەلایەن ئۆپۆزسیۆنەوە داواکراوە.
تورکیای ئەندام لە ناتۆ ڕەخنەگرێکی سەرەکیە لە کارەکانی ئیسڕائیل دژی چەکدارانی حەماس و حزبوڵا و بە کردەوەی نایاسایی و بێباکانە ناوییان دەبات. بازرگانییەکانی لەگەڵ ئیسڕائیلدا ڕاگرتووە و داوای کردووە بەشدار بێت لە دۆسییەی کۆمەڵکوژیدا دژی ئیسڕائیل لە دادگای جیهاندا.
ئیسڕائیل دۆسییەکەی کۆمەڵکوژی و ڕەخنەکانی تورکیا ڕەت دەکاتەوە، دەڵێت ململانێکەی لەگەڵ گروپە ئیسلامییە چەکدارییەکاندا لە پێناو بوونی خۆیدایە وەکو دەوڵەت، دەڵێت ئەو گروپانە لەلایەن ئێرانەوە پشتیوانییان لێدەکرێت کە سوورە لەسەر ڕووخاندنی ئیسڕائیل.
هەفتەی ڕابردوو ئەردۆغان بە پەرلەمانی وت سەرۆک وەزیری ئیسڕائیل بنیامین نەتانیاهو کار لەسەر خەونەکەی دەکات بۆ " یوتۆپیا " و " خاکی بەڵێنپێدراو " بۆ ئیسڕائیل.
ئەردۆغان بەبێ خستنەڕووی هیچ بەڵگەیەک بە دانیشتنێکی کراوەی پەرلەمانی تورکیای وت کە دەیان باڵیۆزی بیانی ئامادەی بوون " دوای لوبنان شوێنی دواتر کە ئیسڕائیل چاوی دەخاتە سەر خاکەکەی ئێمە دەبێت."
دەوڵەت بەهچیلی سەرکردەی پارتی بزووتنەوەی نیشتیمانی هاوپەیمانی سەرەکی ئەردۆغان ڕۆژی سێشەممە وتی " ڕێی تێدەچێت پشێوییەکانی وڵاتانی دراوسێ بگەنە سنوورەکانی ئێمە و لە ئایندەیەکی نزیکدا ئیسڕائیل تورکیا بێزار دەکات."
بەڵام ئۆزگور ئۆزێلی سەرکردەی پارتی سەرەکی ئۆپۆزسیۆن ( پارتی گەلانی کۆماری ) ئەو جۆرە قسانەی ڕەت کردەوە و وتی " ژیرانە نیە بیر لەوە بکەیتەوە کە نەتانیاهو هێرش دەکاتە سەر تورکیا، کە ئەندامێکی ناتۆیە و سوپایەکی گەورەی هەیە."
سەرچاوە/ ڕۆیتەرز
