وەزیری دەرەوەی ئەمەریکا مایک پەمپێیۆ داوای کرد بە زووترین کات چالاکەوانە دیموکراتخوازەکانی هۆنگ کۆنگ ئازاد بکرێن کە بە تۆمەتی کاری " تێکدەرانە " تۆمەتبارکراون، هەروەها هۆشیاریدایە بەرپرسانی هۆنگ کۆنگ لەسەر ئەوەی واشنتن سزایان بەسەردا دەسەپێنێت.
پەمپێیۆ لە بەیاننامەیەکدا جەختی لەوە کردەوە " ئەمەریکا دەستەوەستان ناوەستێت لەکاتێکدا دانیشتوانی هۆنگ کۆنگ ڕووبەڕووی قۆرخکارییەکانی شیوعیەت دەبنەوە."
ئاماژەشی بەوەدا ئەمەریکا تاوتوێ سزاکان دەکات " بۆ سەر هەر کەس و لایەنێک کە بەشدارن لەم هێرشەی سەر دانیشتوانی هۆنگ کۆنگدا."
ڕۆژی چوارشەممە لە هەڵمەتێکدا زیاتر لە 50 کەسایەتی ئۆپۆزسیۆنی دیموکراتخواز لە هۆنگ کۆنگ دەستگیرکران و لەنێویشیاندا پارێزەرێکی ئەمەریکی تێدا بووە، ئەم هەڵمەتی دەستگیرکردنەش بەپێی یاسای ئاسایشی نیشتیمانی چینە کە لەمدواییانەدا بەسەر هۆنگ کۆنگدا سەپێندرا.
سەرچاوە/ فرانس پرێس