ڕاوێژکاری ئەڵمانیا ئانگێلا مێرکڵ لە پەیوەندییەکانی تەلەفونیدا لەگەڵ سەرۆکی بێلاڕوس ئالیکساندەر لوکاشینکۆدا داوای لێکردووە ڕێگە بە یارمەتیە مرۆییەکانی نەتەوە یەکگرتووەکان و کۆمسیۆنی ئەوروپا بۆ کۆچبەرانی سەر سنووری نێوان بێلاڕوس و پۆڵەندا بدات.
وتەبێژەکەی مێرکڵ وتی " ڕاوێژکار دووبارە قسەی لەگەڵ بەڕێز لوکاشینکۆدا کردەوە، جەختی لە پێویستی تەرخانکردنی یارمەتیە مرۆییەکان کردۆتەوە بۆ کۆچبەران، ئەوەش بە پشتیوانی کۆمسیۆنی باڵای پەنابەرانی نەتەوە یەکگرتووەکان و ڕێکخراوی نێودەوڵەتی کۆچبەران و کۆمسیۆنی ئەوروپا."
بێلاڕوس وتی دوو سەرۆکەکە لە پەیوەندییە تەلەفونیەکەیاندا گەیشتوون بە " تێگەیشتنێک " .
دەزگای هەواڵی بێلتای بێلاڕوس وتی " لەگەڵ تاوتوێکردنی کێشەی کۆچبەران بە وردەکارییەوە، هەردوولا گەیشتوون بە تێگەیشتنێک لەسەر ئەوەی چۆن بجوڵێن و بەرەو چارەسەرکردنی ئەم کێشەیە هەنگاو بنێن."
وتیشی لوکاشینکۆ و مێرکڵ ڕێکەوتوون لەسەر ئەوەی بەرپرسانی یەکێتی ئەوروپا و بەرپرسانی بێلاڕوس بەزووترین کات بەمەبەستی گفتوگۆکردن لەسەر بابەتەکە کۆببنەوە.
سەرچاوە/ ڕۆیتەرز