ئیسڕائیل حەماس بە تۆمەتی شاردنەوەی چەکەکانی لەنزیک ناوچەکانی دانیشتوان تۆمەتبار دەکات

ئیسڕائیل گروپی چەکداری حەماسی فەڵەستینی بە تۆمەتی شاردنەوەی کۆگای چەکەکانی لەنزیک ناوچەکانی دانیشتوان تۆمەتبار کرد، ئەوەش دوای ئەوەی کۆمەڵێک وێنەی بڵاوکردەوە کە بەرپرسانی ئیسڕائیل دەڵێن کۆگای چەک و تونێلن لەنزیک قوتابخانەیەک و کارگەیەکی پێپسیدا.

سەرکردایەتی باشووری سوپای ئیسڕائیل گرتەیەکی ڤیدیۆیی بڵاوکردەوە کە فڕۆکەیەکی بێفڕۆکەوان گرتوویەتی و دەڵێت گرتەکە تونێل و شوێنی دروستکردنی چەکی تێدایە کە سەرجەمییان دەکەونە ناو ناوچەکانی هاووڵاتیانی مەدەنییەوە، لەو شوێنانەش نزیک نەخۆشخانەی ئەل شیفا و زانکۆی ئیسلامی غەززە.

شوێنەکانی دیکە بریتین لە قوتابخانەیەک و ناوەندێکی تەندروستی و کتێبخانە و مزگەوتەکان.

وەزیری بەرگری ئیسڕائیل بێنی گانتز وتی " حەماس لە نێو ناوەندەکانی دانیشتوانەوە هێرشەکانی ئەنجام دەدات و ناوەندەکانی دانیشتوانیش دەکاتە ئامانج. جیهان دەبێت ئاگاداری ئەم تاوانە بێت دژ بە مرۆڤایەتی و باجێکی گەورە لە حەماس بسەنێت."

وتیشی ئیسڕائیل بە بەهێزییەوە بەرگری لە دانیشتوانەکەی دەکات.

لەلای خۆیەوە گروپی چەکداریی ئیسلامی حەماس بەیاننامەکەی ئیسڕائیلی ڕەت کردەوە.

وتەبێژی حەماس حازم قاسم وتی " ئەمە ئەو درۆیانەن کە داگیرکەر بڵاوییان دەکاتەوە تاوەکو بیانوو بۆ تاوانەکانی دژ بە هاوڵاتیانی مەدەنی بێتاوان بهێنێتەوە کە لە شەڕەکانیدا دژی غەزە ئەنجامیداون."

وتیشی " هۆشداری دەدەین لەسەر ئەوەی ڕەنگە ئەم درۆیانە پاساوێک بن بۆ ئەنجامدانی تاوانی زیاتری دژ بە هاوڵاتیانی مەدەنی."

سەرچاوە/ ڕۆیتەرز