سەرۆکی ئێران حەسەن ڕۆحانی ئەمەریکای تۆمەتبار کرد بە تۆمەتی پلانگێڕان بۆ سوود وەرگرتن لە فشارە ئابوورییەکان تاوەکو ڕژێمی کۆماری ئیسلامی لەناوببات و بەدووری زانی وتوێژ لەگەڵ واشنتندا بکات.
ڕۆحانی وتی " ئێران لە ناو جەنگێکی ئابووری و دەروونیدایە لەگەڵ ئەمەریکا و هاوپەیمانەکانیدا. ئامانجی ئەوان گۆڕینی ڕژێمەکەیە. بەڵام ئێمە ڕێگەیان پێنادەین چونکە نەتەوەکەمان و سەرکردایەتیمان یەکگرتوون دژ بە دوژمنانمان."
دوای ئەوەی سەرۆکی ئەمەریکا دانۆڵد ترامپ لە ڕێکەوتنە ناوەکییەکەی نێوان ئێران و زلهێزەکانی جیهاندا کشایەوە، گرژییەکانی نێوان ئێران و ئەمەریکا زیادیان کرد و واشنتن سزاکانی سەپاندەوەی بەسەر تاراندا. سەرۆک ترامپ وتی ڕێکەوتنەکە هەڵەی تێدایە چونکە سنوورێکی بۆ بەرنامە موشەکییە باڵیستییکەی ئێران و چالاکییەکانی ئەو وڵاتە لە سوریا و یەمەن و لوبنان و عێراق دانەناوە.
وڵاتانی ئەوروپی بەشدار لە ڕێکەوتنەکە و ڕوسیا و چین دژایەتی بڕیارەکەی ئەمەریکایان کرد بۆ سەپاندنەوەی سزاکان بەسەر هەردوو کەرتی نەوت و دارایی ئێراندا و هەوڵدەدەن ڕێکەوتنەکە ڕزگار بکەن.
سەرچاوە/ ڕۆیتەرز