فەڕەنسا سەرکۆنەی کارەکانی هێزەکانی ڕووسیا دەکات لە ئۆکرانیا

وەزیری دەرەوەی فەڕەنسا ژان ئیڤ لۆدغیان وتی فەڕەنسا سەرکۆنەی ئەو " سوکایەتییە گەورەیە " دەکات کە هێزەکانی ڕووسیا لەم هەفتانەی دواییدا لە ئۆکرانیا ئەنجامییان داوە.

لۆدغیان باسی لە شارۆچکەی بوچا کرد کە دەکەوێتە دەرەوەی کیێڤی پایتەخت و بەرپرسانی ئۆکرانیاش دەڵێن هێزەکانی ڕووسیا " کۆمەڵکوژییان " تیادا ئەنجامداوە.

لۆدغیان لە بەیاننامەیەکدا وتی ئەو جۆرە سوکایەتییانە دەگەنە ئاستی تاوانی جەنگ و فەڕەنساش لەگەڵ بەرپرسانی ئۆکرانیا و دادگای تاوانی نێودەوڵەتیدا کار دەکات بۆ دادگاییکردنی ئەوانەی بەرپرس بوون لەو کارانە.

لەلای خۆشیەوە سەرۆکی فەڕەنسا ئیمانوێل ماکرۆن وتی ئەو وێنانەی کە لە بوچاوە بڵاودەکرێنەوە " ناتوانیت بەرگەیان بگریت."

ماکرۆن وتی " بەرپرسانی ڕووسیا دەبێت وەڵامی ئەم تاوانانە بدەنەوە." هەروەها هاوسۆزی خۆی بۆ قوربانییان و گەلی ئۆکرانیا دەربڕی.

سەرچاوە/ ڕۆیتەرز