کاربه‌ده‌سـتێـکی وه‌زاره‌تی ناوخۆی عێراق ده‌ڵێت 13 که‌س ده‌سـتگیرکراون له‌سه‌ر په‌یوه‌ندیـیان به زنجیره ته‌قینه‌وه‌کانی هه‌فته‌ی ڕابردووی به‌غدا که تیایاندا 127 که‌س کوژران و 400 که‌سی دیکه برینداربوون.
ئه‌م ڕاگه‌یاندنه ڕۆژی یه‌کشه‌ممه درا هاوکاتی ئه‌وه‌ی یاسادانه‌رانی عێراق جارێـکی دیکه لێپـرسینه‌وه‌یان له‌گه‌ڵ کاربه‌ده‌سـتاندا ده‌کرد له‌سه‌ر هه‌ڵه ئاسایشیـیه‌کانی ناو پایته‌خت، ئه‌وه‌ی له مانگی هه‌شته‌وه تا ئێسـتا 3 زنجیره ته‌قینه‌وه‌ی به‌هێزی لێی‌ڕوویداوه.
کۆمه‌ڵێـکی سه‌ر به ئه‌لقاعیده که به ده‌وڵه‌تی ئیسلامی له عێراق ناسـراوه به‌رپـرسـیارێتی خۆی له‌و ته‌قینه‌وانه‌ی ڕۆژی سێشه‌ممه‌ی به‌غدا ڕاگه‌یاندووه و هۆشـداری داوه به‌وه‌ی هێرشی دیکه به‌ڕێوه‌یه.
ڕۆژی شه‌ممه وه‌زیری ناوخۆی عێراق جواد ئه‌لبۆلانی گوتی پـێشـتر سه‌باره‌ت به‌و ته‌قینه‌وانه ئاگاهی دراوه‌ته هێزه‌کانی ئاسایش، به‌ڵام به‌هۆی بیرۆکراسی و هاوکاری که‌می نێوان وه‌زاره‌ته‌کان که‌لێن له باری ئاسایشیدا دروست‌بووه و نه‌توانراوه هێرشـه‌کان ڕابگیرێن.
له توندوتیژیـیه‌کانی ڕۆژی یه‌کشه‌ممه‌ش، پـۆلیسی عێراق ده‌ڵێت 3 ئۆتۆمبیلی بۆمبڕێژکراو له سێ ناوچه‌ی جیادا ته‌قیونه‌ته‌وه و بوونه‌ته مایه‌ی کوژرانی به لایه‌نی که‌م 3 که‌س و برینداربوونی زیاتر له 30 که‌سی دیکه.