دەسەڵاتدارانی ئوردن رێوشوێنی توندیان لە سەرانسەری وڵات گرتەبەر، پاش هێرشێک بۆ سەر کڵێسا ئۆرتۆدۆکسی یۆنانی لە پارێزگای کەرەک، کە تا ئێستا هەشت کەس گیانیان لەدەستداوە و نزیکەی چل کەسیش بریندارن.
هێزەکانی ئاسایشی ئوردن بە دوای هێرشبەراندا دەگەڕێن و تا ئێستا هیچ لایەنێک بەرپرسیارێتی هێرشەکەی نەگرتووەتە ئەستۆ.
بەپێی دەزگای ئاسایشی گشتی ئوردن، چەند چەکدارێک دوانیوەڕۆی ڕۆژی هەینی لە کاتی بەڕێوەچوونی مەراسیمی بەخاکسپاردنی تەرمێک لە گوندی حەموودی سەر بە پارێزگای کەرەک تەقەیان لە ماتەمگێڕان کرد.
مازن ئەلفرایە، وەزیری ناوخۆی ئوردن، لە کۆنگرەیەکی رۆژنامەنووسیدا، هێرشەکەی بە کردەوەیەکی تیرۆریستی ناو برد و وتی گرووپێک لە توندڕەوان لەپشت ڕووداوەکەوەن و هێزە ئەمنییەکان بەشوێنیاندا دەگەڕێن.
عوبیدوڵڵا ئەلموتایعە، بەڕێوەبەری دەزگای ئاسایشی گشتی ئوردن، لە هەمان لە کۆنگرەیەکی رۆژنامەنووسیدا وتی کە ژمارەی قوربانییەکان گەیشتووەتە هەشت کەس و دەیان کەسی دیکەش بریندار بوون و دڵنییادا کە بەرپرسانی هێرشەکە بە زوویی دەستگیر دەکرێن و دەخرێنە بەردەم دادگا.
شا عەبدوڵڵا دووەم، کە چەند کاتژمێرێک دوای هێرشەکە سەردانی کەرەکی کرد، لە پەیامێکدا کە لە تۆڕی ئێکس بڵاویکردەوە بەڵینیدا کە "هێرشی تیرۆریستی دژی کەرەک بە توندترین وەڵام وەڵام دەدرێتەوە" و وتی"بە ئاسنی ناتوانرێت ئاسایشی نیشتمان بخاتە مەترسییەوە."
هەروەها جەعفەر حەسەن، سەرۆک وەزیرانی ئوردن، لە پەیامێکدا لە تۆڕی ئێکس وتی هێرشەکە "بەرهەمی بیری تیرۆریستی و توندڕەوی کوێرانەیە و رێگەنادەین کۆمەڵگا بەرەو ئەو ئاڕاستەیە بڕوات."
بە پێی هەواڵێکی ئاژانسی ڕۆیتەرز، لە دوای ڕووداوەکە، باڵیۆزخانەی ئەمەریکا لە عەمان ڕایگەیاند ئاسایش ڕێوشوێنی توندی لە ناوەندە بازرگانییەکان و باڵیۆزخانە بیانییەکان و ژمارەیەک شوێنی گشتی گرتووەتەبەر و هەوڵی دەستگیرکردنی هێرشبەران بەردەوامە.