ئاژانسی هەواڵی نیشتیمانی عێراقی ئەمڕۆ دووشەممە لەزاری نووسینگەی ڕاگەیاندنی وەزارەتی ناوخۆی عێراقەوە ڕادەستکردنی بارەگای سەرەکی سەربازیی ئەمەریکای لە فڕۆکەخانەی نێودەوڵەتی بەغدا بە هێزە عێراقییەکان ڕاگەیاند.
لیوا سەعید مەعەن، بەرپرسی راگەیاندن و پەیوەندییەکان لە وەزارەتی ناوخۆی عێراق، بە فەرمی ئەم هەنگاوەی لە کامپ ڤیکتۆریا ڕاگەیاند و وتی، "ڕادەستکردنەوەی بنکەی ئەمەریکا لە فڕۆکەخانەی نێودەوڵەتی بەغدا و هەماهەنگی سەبارەت بە کشانەوەی هێزەکانی تورکیا لە کامپی بەعشیقە دوو هەنگاوی گرنگن بۆ بەهێزکردنی سەروەریی عێراق و بەهێزکردنی کۆنترۆڵی دامەزراوەکانی دەوڵەت لە سەرانسەری وڵاتدا."
مەعەن وتیشی، "قۆناغێکی گرنگی بوونی سەربازی بیانی کۆتایی پێهات." ئەو لە لێدوانێکی دیکەشدا بۆ ئاژانسی هەواڵی ئەڵمانیا ئاماژەی بەوەکردووە کە پرۆسەی کشانەوە و ڕادەستکردنەوەی بنکە سەربازییەکان بەپێی پلانێکی گشتگیر بەڕێوە چووە.
هەتا ئێستا وەزارەتی بەرگری ئەمەریکا هیچ پشتڕاستکردنەوە یان بەیاننامەیەکی فەرمی سەبارەت بە قۆناغی کۆتایی کشانەوەی هێزەکانی ئەمەریکا رانەگەیاندووە.
ساڵی 2024، واشنتن و بەغدا ڕێککەوتن لەسەر ئەوەی 30ـی نۆی 2026 وەک وادەی کۆتاییهێنان بە ئەرکی ناتۆ و بوونی هێزەکانی ئەمەریکا دیاری بکرێت.