سوپای ئیسرائیل ڕۆژی یەکشەممە لە پۆستێکدا لە تۆڕی ئێکس ڕایگەیاند ئیسماعیل ئەبوفول فەرماندەی ناوەندێکی بەرهەمهێنانی چەکی حەماسی کوشتووە.
سوپای ئیسرائیل ڕایگەیاندووە ئیسماعیل ئەبوفول فەرماندەی دامەزراوەیەکی بەرهەمهێنانی چەک لە هەڵمەتێکی هاوبەش لەگەڵ ڕێکخراوی شین بەت لە ناوچەی ئەلمەغازی لە کەرتی غەززە کوژراوە.
لە ڕاگەیەندراوە سەربازییەکەی ئیسرائیلدا هاتووە ئەبوفول دەستی هەبووە لە دروستکردنی تەقەمەنی و مووشەکی دژە تانک بۆ باڵی سەربازی حەماس.
بەگوێرەی ڕاگەیەندراوەکە، شوێنی بەرهەمهێنانی چەک کە دەکەوێتە نزیک ناوەندێکی دابەشکردنی یارمەتییە مرۆییەکان کە لەلایەن ڕێکخراوێکی نێودەوڵەتییەوە بەڕێوەدەبرا، کراوەتە ئامانج.
هەروەها سوپای ئیسرائیل دەڵێت حەماس بە شێوەیەکی سیستماتیکی ڕێککەوتنی ئاگربەستی پێشێل کردووە و هەوڵی دووبارە بنیاتنانەوەی توانا سەربازییەکانی دەدات.