سەرۆکی تورکیا لە دیدارێکدا لەگەڵ سەرۆکوەزیرانی عێراق ڕایگەیاند وڵاتەکەی ئامادەیە هەموو پێداویستییەکانی نەوتی خاوی خۆی لە عێراق دابین بکات.
ڕەجەب تەیب ئەردۆغان لە کۆنگرەیەکی ڕۆژنامەوانیدا لەگەڵ عەلی زەیدی ڕایگەیاند "سەرۆکوەزیرانی عێراق دەڵێت وڵاتەکەی دەتوانێت ڕۆژانە یەک ملیۆن بەرمیل نەوت ڕادەستی تورکیا بکات، ئەمەش یەکسانە بەو بڕە نەوتە خاوەی پێویستمانە و ئێمە پێشوازی لە دابینکردنی نەوت لە وڵاتی دراوسێ دەکەین و چیتر پێویست ناکات پشت بە شوێنی دیکە ببەستین."
تورکیا لە ساڵی ڕابردوودا ڕۆژانە نزیکەی یەک ملیۆن و 200 هەزار بەرمیل نەوتی هاوردە کردووە.
کۆمپانیای نیشتمانی نەوتی تورکیا ڕۆژی سێشەممە لەسەدا 15ی پشکەکانی کۆمپانیای بی پی بەریتانی لە کێڵگە نەوتییەکانی ناوچەی کەرکووک لە عێراق کڕی. یەدەگی نەوت و گازی ئەو پێنج کێڵگەیە کە کۆمپانیای نەوتی نیشتمانی تورکیا پشکەکانی کڕیون، یەکسانە بە نزیکەی 3 ملیار بەرمیل و ئەردۆغان ئەمە بە "هەنگاوێکی مێژوویی بۆ پەرەپێدانی هاوکاریی هەمەلایەنە لە بواری وزە"دا لە نێوان هەردوو وڵات ناو دەبات.
ئەردۆغان ئاماژەی بەوەشکرد لەگەڵ پەرەپێدانی کێڵگە نەوتی و گازییەکانی کەرکووک لەلایەن کۆمپانیای نیشتمانی نەوتی تورکیا و هاوبەشەکانی دیکەوە، ڕۆژانە یەک ملیۆن بەرمیل نەوت و گاز بەرهەمدەهێنرێت.
لە ئێستادا بۆرییەک لە کەرکوکەوە بۆ بەندەری جیهانی تورکیا هەیە کە توانای ڕۆژانەی یەک ملیۆن و 500 هەزار بەرمیل نەوتی هەیە، بەڵام تەنها یەک لەسەر پێنجی تواناکەی بەکاردەهێنرێت، هەروەها بە شێوەیەکی سەرەکی نەوت لە هەرێمی کوردستانەوە دەگوازێتەوە بۆ بەندەری جیهانی تورکیا بۆ هەناردەکردنی بۆ بازاڕەکانی جیهان.
تورکیا و عێراق لە ساڵی ڕابردوودا قەبارەی بازرگانی دوولایەنەیان 17 ملیار دۆلار بووە کە لە ماوەی دەیەی ڕابردوودا زیاتر لە دوو هێندە زیادی کردووە.
تورکیا لە دوای سەپاندنی سزاکانی سەر کۆماری ئیسلامی لە ئێران کڕینی نەوتی لە ئێران ڕاگرتووە و ڕێککەوتنی 25 ساڵەی کڕینی گازی ئێرانیش لە کۆتایی ئەم مانگەدا کۆتایی دێت.
