عەلی ئەلزەیدی، سەرۆک وەزیرانی عێراق، ئەمڕۆ پێنجشەممە، هێرشی فڕۆکەی بێفڕۆکەوانی بۆ سەر هەولێری پایتەختی هەرێمی کوردستان شەرمەزار کرد و بە هەوڵێک بۆ تێکدانی سەقامگیریی وڵات وەسفی کرد.
زەیدی هێرشەکەی سەر هەولێری بە "هەوڵێکی تاوانکاری" ناوبرد و وتی حکومەتەکەی ئەو جۆرە هێرشانە "قبووڵ ناکات" کە هەڕەشە لە ئاسایش و سەقامگیری کۆمەڵگەی عێراق دەکەن.
زەیدی لە تۆڕی کۆمەڵایەتی ئێکس ڕایگەیاند، "لە ڕوانگەی بەرپرسیارێتی دەستوری خۆمانەوە، بە توندی ئیدانەی هێرشی فڕۆکەی بێفڕۆکەوان دەکەین کە ئاسمانی شاری هەولێری لە هەرێمی کوردستان پێشێل کردووە".
دەزگای بەرەنگاربوونەوەی تیرۆری هەرێمی کوردستان ڕایگەیاند، هاوپەیمانی بە سەرۆکایەتی ئەمەریکا هەشت فڕۆکەی بێفڕۆکەوانی بۆمبڕێژکراویان لە ئاسمانی هەولێر خستووەتە خوارەوە لە نێوان کاتژمێر 8:53 بۆ 9:20ی سەر لە ئێوارە. بە کاتی ناوخۆیی.
زەیدی سەرۆک وەزیرانی عێراق ڕایگەیاند، فەرمانی بە دەزگا ئاسایشییەکانی عێراق کردووە، لەگەڵ هێزە ئاسایشییەکانی هەرێمی کوردستان کاربکەن بۆ ڕێگریکردن لەو جۆرە هێرشانە و بەرپرسان و بکەرانی ئەم کارە دەستگیر بکرێن.
گوتیشی: "فەرمانمان بە دەزگا و دامەزراوە ئەمنییە پەیوەندیدارەکان کردووە لەگەڵ هێزە ئەمنییەکانی ناوچەکە کاربکەن بۆ ئەوەی هەموو ڕێکارێکی پێویست بگرنەبەر بۆ ڕێگریکردن لە دووبارەبوونەوەی ئەو جۆرە هێرشانە و ڕێگریکردن لە هەر کەسێک کە هەوڵی تێکدانی ئاسایشی کۆمەڵگەی عێراقیمان بدات".
سەرەڕای نیگەرانی لە ئەگەری کاریگەری لەسەر هاتوچۆی ئاسمانی، بەرپرسانی نێودەوڵەتی لە هەولێر بە میدیا کوردییەکانیان ڕاگەیاند، فڕۆکەخانەکە هێشتا کراوەیە و سەرجەم گەشتەکان بەشێوەیەکی ئاسایی بەڕێوەدەچن.
تا ئێستا دەسەڵاتداران هیچ تاک و گروپێکیان بە بەرپرسیار دانەناوە و هیچ تاک و گروپێکیش بەرپرسیارێتی خۆی لەو هێرشانە نەگرتووەتە ئەستۆ.
هێرشەکە هاوکات بوو لەگەڵ سەردانێکی فەرمی زەیدی بۆ واشنتن، کە لەگەڵ دۆناڵد ترەمپ، سەرۆکی ئەمەریکا و بەرپرسانی ئەمەریکا کۆبووەوە و تاوتوێی پتەوکردنی پەیوەندییەکانی نێوان هەردوو وڵاتیان کرد.
شایانی باسە کە هێرشی فڕۆکە بێفڕۆکەوان و موشەکەکان چەندین جار بنکە سەربازییەکان و ژێرخانی وزە و ناوچەی دانیشتوانی کردووەتە ئامانج، ئەمەش نیگەرانییەکانی لەبارەی ئاسایشی هەرێمی کوردستانەوە دروستکردووە.