جێگری سەرۆکی ئەمەریکا جەختی کردەوە لەوەی گتوگۆکان بۆ گەیشتن بە چارەسەرێکی دیپلۆماسی لەگەڵ ئێران ئەگەری هەیە ببێتە هۆی دووبارە داڕشتنەوەی ڕۆژهەڵاتی ناوەڕاست و گەیشتن بە چارەسەرییەکی هەمیشەیی.
جەی دی ڤانس، جێگری سەرۆکی ئەمەریکا، ڕۆژی هەینی ئەو زانیاریانەی بە "نادروست" و "سەیروسەمەرە" ناوبرد گوایە ئەمەریکا ڕەزامەندی دەربڕیوە چەندین ملیار دۆلار لە پارەی سڕکراوی ئێران بداتەوە بەو وڵاتە.
ڕایگەیاند، "ئێرانییەکان هیچ پارەیەکی نەختینە وەرناگرن و هیچ بڕە پارەیەک تەنیا بۆ واژۆکردنی گرێبەستێک یان بەشداریکردنیان لە کۆبوونەوەیەکدا ئازاد ناکرێت."
ڤانس گوتی ڕێککەوتنەکە بە شێوەیەک داڕێژراوە کە نیگەرانییەکانی ئەمەریکا و هاوپەیمانەکانی لە پێشینەی ئامانجەکاندایە، ئنجا "ئەگەر کۆماری ئیسلامی ئێران ئەرکەکانی خۆی جێبەجێ بکات، ئەوکات سوودە ئابوورییەکان بۆ ئەوان و هەموو ناوچەکە دەبێت."
جێگری سەرۆکی ئەمەریکا جەختی کردەوە "ئەم ڕێککەوتنە توانای ئەوەی هەیە کە ناوچەکە دووبارە دروست بکاتەوە و ببێتە هۆی ئاشتییەکی هەمیشەیی."
ڤانس دڵنیایی دا لەوەی لە کۆتایییدا سەرۆکی ئەمەریکا دەرەنجامێکی "باش" لەو پرسەدا بۆ ئەمەریکا بەدەست دەهێنێت.
