سەرۆک وەزیرانی هیندستان نارێندرا مۆدی بەهۆی کاریگەرییە ئابوورییەکانی شەڕی ئێرانەوە داوا لە هاوڵاتیانی وڵاتەکەی دەکات بەکارهێنانی سوتەمەنی و گەشتی دەرەکی و کڕینی زێر سنوردار بکەن.
مۆدی ڕۆژی یەکشەممە لە شاری حەیدەرئاباد ئاماژەی دا بە بەرزبوونەوەی نرخی جیهانی وزە و داوای لە هاوڵاتیانی وڵاتەکەی کرد هاتوچۆی گشتی لە بری ئۆتۆمبێلی تایبەت بەکاربهێنن یان لە ماڵەوە کار بکەن.
سەرۆک وەزیرانی هیندستان هەروەها داوای لە هاوڵاتیان کرد کڕینی زێڕ و گەشت بۆ دەرەوە سنوردار بکەن و خەرجییە ناپێویستەکان کەم بکەنەوە، لە کاتێکدا چارەنووسی دۆخی ناوچەی ڕۆژهەڵاتی ناوەڕاست بە ناجێگیری ماوەتەوە.
ئەمە لە کاتێکدایە دوێنێ یەکشەممە سەرۆکی ئەمەریکا دۆناڵد ترامپ ڕایگەیاند وەڵامی ئێران بۆ پێشنیارەکەی ئەمەریکا بە ڕێککەوتن "بە تەواوی قبوڵنەکراوە."
