سوپای ئیسرائیل ڕۆژی پێنجشەممە لە هەژماری خۆی لە ئێکس ڕایگەیاند ڕۆژی چوارشەممە لە هێرشێکی ئاسمانیدا بۆ سەر گەڕەکەکانی باشووری بەیروت کە لە ژێرکونتڕوڵی حەماسدایە، فەرماندەیەکی باڵای حزبوڵای لە یەکەی ڕزوان کردووەتە ئامانج.
ئەمە یەکەم هێرش بوو بۆ سەر دەورووبەری بەیروت لەدوای ڕاگەیاندنی ئاگربەست لە نێوان ئیسرائیل و حزبوڵا کە چەند ڕۆژ پیش ئێستا ڕاگەیاندرا.
لە بەیاننامەیەکی هاوبەشی بنیامین نەتانیاهۆ، سەرۆک وەزیرانی ئیسرائیل و ئیسرائیل کاتز، وەزیری بەرگری ئیسرائیلدا هاتووە "یەکەی ڕزوان بە سەرۆکایەتی ئەم فەرماندەیە بەرپرسیار بوون لە تەقەکردن بۆسەر ناوچەکانی نیشتەجێبوونی ئیسرائیل و زیانگەیاندن بە هێزەکانی سوپای ئیسرائیل."
هەروەها سوپای ئیسرائیل ڕۆژی پێنجشەممە ڕایگەیاند جگە لە کوشتنی فەرماندەی هێزی ڕزوان لە ڕۆژی چوارشەممەدا، ئەندامانی سەرەکی دیکەی حەماس لەم هێرشانەدا کوژراون، لەوانە: محەمەد عەلی بزی، فەرماندەی بەشی هەواڵگری لە یەکەی نەسر و حسێن حەسەن ڕۆمانی، بەرپرسی بەرگری ئاسمانی حزبوڵا.
لە ڕاگەیەندراوەکەدا ئاماژە بەوەشکراوە ئەم فەرماندانە بەشداربوون لە پەرەپێدان و جێبەجێکردنی پلانی تیرۆریستی دژ بە هێزەکانی ئیسرائیل و هاووڵاتیانی.
بە گوێرەی سوپای ئیسرائیل لە سەرەتای دەستپێکردنی ئاگربەستەوە تا ئێستا زیاتر لە 220 ئەندام و فەرماندەی حزبوڵا "کە هەڕەشە بوون بۆ سەر هێز و هاووڵاتیانی ئیسرائیل" کوژراون.
سوپای ئیسرائیل ئاماژەی بەوەشکردووە، تەنها لە هەفتەی ڕابردوودا، "زیاتر لە 85 ئەندامی" حزبوڵا کوژراون و زیاتر لە 180 لە ژێرخانی سەربازیی ئەو گرووپە کە لەلایەن کۆماری ئیسلامییەوە پشتیوانی دەکرێت، کراونەتە ئامانج، لەوانە ناوەندەکانی فەرماندەیی، کۆگاکانی چەک و شوێنی هەڵدانی مووشەک لە سەرانسەری باشووری لوبنان.
ئاژانسی هەواڵی فرانس پرێس بە پشتبەستن بە سەرچاوەیەکی نزیک لە حیزبوڵای لوبنان ڕایگەیاند، فەرماندەی باڵای یەکەی ڕزوان لە هێرشەکەی ئیسرائیل بۆ سەر زاحیە کوژراوە.
ئەو سەرچاوەیە کە داوای کردووە ناوی ئاشکرا نەکرێت، بەو ئاژانسە هەواڵییەی ڕاگەیاندووە مالیک بەلوت، فەرماندەی ئۆپەراسیۆنەکان لە یەکەی ڕزوان لە هێرشەکەدا کوژراوە.
حیزبوڵای لوبنان کە لەلایەن ئەمەریکاوە وەک ڕێکخراوێکی تیرۆریستی دەستنیشان کراوە، تا ئێستا بە فەرمی کوژرانی ئەندامە باڵاکەی پشتڕاست نەکردووەتەوە.