سوپای فەڕەنسا ڕایدەگەیەنێت کەشتی فڕۆکەهەڵگری شارڵ دوگۆڵ بەرەو دەریای سوور و کەنداوی عەدەن کەوتووەتە رێگا، ئەمەش لە چوارچێوەی هەوڵە هاوبەشەکانی فەرەنسا و بەریتانیا بۆ ئامادەکاری بۆ ئەرکێکی ئەگەری لە داهاتوودا بۆ یارمەتیدانی دەستەبەرکردنی ئازادی کەشتیوانی لە تەنگەی هورمز.
هاوکات نووسینگەی ئیمانوێل ماکرۆن ڕایدەگەیەنێت فەرەنسا و هاوبەشەکانی دەتوانن پارێزراوبوونی تەنگەی هورمز مسۆگەر بکەن.
ڕاگەیەندراوەکەی نووسینگەی ماکرۆن دەشڵێت، فەرەنسا پێی خۆشە پرسی تەنگەی هورمز جیا بێت لە دانوستانەکانی ئێستای نێوان ئەمەریکا و ئێران.
بە گوێرەی هەواڵەکان، کەشتی فڕۆکەهەڵگری شارڵ دوگۆڵ ئەمڕۆ چوارشەممە بە کەناڵی سوێزدا تێپەڕیوە و بەرەو باشوور بەرەو دەریای سوور ڕۆیشتووە.
کەشتی فڕۆکەهەڵگری شارڵ دوگۆڵ دەتوانێت بۆ ماوەی چوار بۆ پێنج مانگ لەسەر دەریادا بمێنێتەوە و ماوەیەکی کەم دوای دەستپێکردنی هێرشە ئاسمانییەکانی ئەمەریکا و ئیسرائیل بۆ سەر ئێران، لە ڕۆژهەڵاتی دەریای ناوەڕاست جێگیر کرابوو.
