سەرۆکی ئەمەریکا ڕۆژی سێشەممە داوای لە ئێران کرد بە ئازادکردنی هەشت ژن کە بە وتەی خۆی مەترسی لەسێدارەدانیان لەسەرە، چانسی سەرکەوتنی دانوستانەکانی ئاشتی لەگەڵ ئەمەریکا زیاد بکات و وتی ئەمە دەتوانێت سەرەتایەکی باش بێت بۆ دانوستانەکان.
سەرۆک ترامپ لە تۆڕی کۆمەڵایەتی تروث نووسیویەتی "بۆ سەرکردەکانی ئێران کە بەم زووانە لەگەڵ نوێنەرانی من دانوستاندن دەکەن: زۆر پێزانینم هەیە ئەگەر ئەو ژنانە ئازاد بکرێن. دڵنیام پێزانینیان هەیە. تکایە زیانیان پێ نەگەیەنن! ئەمە سەرەتایەکی گەورە دەبێت بۆ دانوستانەکانمان!!!."
ئەم لێدوانەی ترامپ دوای ئەوە هات کە بانگەشەیەک لە سۆشیال میدیا لەلایەن ئیال یاکوبی، چالاکوانی گەنجی لایەنگری ئیسرائیل لە ئەمەریکا لە کەناڵی ئێکس بڵاوکرایەوە کە هەشت ژن لە ئێران مەترسی لەسێدارەدانیان لەسەرە.
لە پۆستەکەدا ناوی ئەو ژنانە نەهاتووە، بەڵام بە پشتبەستن بە بەدواداچوونەکان، ئەو کەسانەی باسکراون بریتین لە بیتا هێمەتی، غەزال قەلەندەری، گۆڵناز نەراقی، پەناه موەحیدی، ئەنسیە نەجاتی، مەحبووبە شەبانی، ڤینۆس حوسێنیژاد، و دیانا تاهرئابادی.