عەرەبستانی سعودیە ڕادەگەیەنێت هەتا ئێستا مەوڵەت نەدراوە بە فڕۆکەکانی کە لە دۆحا بنیشنەوە بۆ گواستنەوەی خەڵکی بۆ مەڕاسیمی ساڵانەی حەج.
تەلەفیزیۆنی دەوڵەتی عەرەبستانی سعودیە لە زاری ساڵح ئەلجاسر، بەرپرسی هێڵی ئاسمانی سعودیەوە لە ڕۆژی یەکشەممە ڕایگەیاند کاربەدەستانی قەتەری هێشتا ڕێگەیان بە فڕۆکەکانی شانشینەکە نەداوە لە پایتەختی قەتر بنشێنەوە سەرەڕای ئەویە چەند ڕۆژێک لەمەو بەر بە فەمی داوا کراوە کە حاجییانی قەتەری لە فڕۆکەخانەی نێودەوڵەتی دۆحا ببرێن بۆ حەج.
لە هەفتەی ڕابوردوو عەرەبستانی سعودیە سنوری لەگەڵ قەتەر کردەوە بە مەبەستی ڕێگەدان بە قەتەرییەکان تا مەڕاسیمی حەجیان بەجێ بگەیەنن. شای عەرەبستانی سعودیە ڕێگەشی دا بە فڕۆکەکانی شانشینەکە کە حاجییەکان لە قەتەرەوە هەڵبگرن.