هوشیار عه‌بدوڵا: بۆ چاکسازیی له‌عێراق پێویسته‌ له‌خواره‌وه‌ ده‌ستپێبکرێت نه‌ک له‌سه‌ره‌وه‌.

قه‌واره‌ کوردیه‌کانی په‌رله‌مانی عێراق له‌به‌یانامه‌یه‌کدا چه‌ند خاڵێکیان بۆ ڕای گشتی ڕوونکردوه‌ته‌وه، له‌ڕۆشنایی ئه‌م به‌یانامه‌یه‌دا ‌ئایا ئه‌توانین بڵێین هه‌نگاوه‌کانی عه‌بادی بۆ گۆڕانکاری و پێکهێنانی حکومه‌تی ته‌کنۆکرات ناویه‌تی شکستی هێناوه‌، پۆسته‌کانی له‌نێوان کوردو سوونه‌ و شیعه‌دا دابه‌شکراوه‌ ئه‌گه‌ر گۆڕاناکاری تێدا بکرێت کورد ئه‌و پۆستانه‌ له‌ده‌ستده‌دات، پێشتر پێکهاتنی هه‌رسێ سه‌رۆکایه‌تیه‌که‌ کاتی زۆری پێچوو، ئه‌گه‌ر داواکاری هه‌ڵوشانه‌وه‌ی هه‌رسێ سه‌رۆکایه‌تیه‌که‌ سه‌ربگرێت و به‌ئاسانی هه‌ڵوه‌شێته‌وه‌ ده‌بێت به‌ هامان پرۆسه‌دا بڕۆن بۆ پێکهێنانه‌وه‌ی.

له‌لایه‌کی‌که‌وه‌ ئایا ئه‌مه‌ هه‌نگاوێکه‌ بۆ بچووکردنه‌وه‌ی ده‌سه‌ڵاتی کورد له‌حکومه‌ت و ده‌سه‌ڵات له‌عێراقدا.

له‌مباره‌یه‌وه‌ هوشیار عه‌بدوڵا سه‌رۆکی فراکسێۆنی گۆڕان له‌په‌رله‌مانی عێراق ده‌ڵێت "تاڕاده‌یه‌ک هه‌نگاوه‌کانی عه‌بادی شکستی هێناوه‌، ئه‌و شێوازه‌ی به‌ڕێز عه‌بادی به‌رکاری هێناوه‌ هه‌ڵه‌یه‌، له‌عێراقدا کێشه‌کان له‌مرۆڤه‌کان و به‌رپرسه‌کان گه‌وره‌تن، جه‌سته‌ی حکو‌مه‌ت و ده‌وڵه‌تی عێراقی تاراده‌یه‌کی زۆر به‌حزبی و سیاسی کراوه‌‌".

ده‌شڵێت "له‌ڕاستیدا ده‌بوو عه‌بادی له‌بری گۆڕینی ده‌مووچاو ده‌ست بۆ به‌هێزکردنی دامه‌زراوه‌ی چاودێری و به‌دواداچوونی گه‌نده‌ڵی به‌هێزکات، له‌گه‌ڵ په‌رله‌ماندا هه‌وڵی بدایه‌ لایه‌نی چاودێری چالاک بێت بۆ ئه‌وه‌ی مه‌له‌فه‌کانی گه‌نده‌ڵی بکرێته‌وه‌‌ و دراوی دزراو و براو‌ بۆ ده‌ره‌وه‌ی ووڵات بۆ ناوخۆی عێراق بهێنرێته‌وه‌".

ووریا کاڵی ئه‌م گفتووگۆیه‌ی له‌گه‌ڵ هوشیار عه‌بدوڵا سه‌رۆکی فراکسێۆنی گۆڕان له‌په‌ڕله‌مانی عێراق کردوه‌.

زانیاری زیاتر له‌ده‌قی ووتووێژه‌‌که‌دایه‌.

گفتووگۆ له‌گه‌ڵ هوشیار عه‌بدوڵا