Accessibility links

نوێنەری تایبەتی ئەمەریکا بۆ ئەفغانستان دەست لەکاردەکێشێتەوە


زەڵمای خەلیلزاد

دوای دوو مانگ لە کشانەوەی ئەمەریکا لە ئەفغانستان، نوێنەری تایبەتی ئەمەریکا بۆ ئەفغانستان زەڵمای خەلیلزاد دەستی لەکارەکەی کێشایەوە.

وەزیری دەرەوەی ئەمەریکا ئەنتۆنی بلینکن دەست لەکارکێشانەوەی زەڵمای خەلیلزادی ڕاگەیاند و وتی تۆماس وێستی جێگری شوێنەکەی دەگرێتەوە.

بلینکن وتی " سوپاسی دەکەم لەسەر ئەو خزمەتەی پێشکەشی خەڵکی ئەمەریکای کردووە."

لە ماوەی سێ ساڵی ڕابردوودا و لەژێر دەسەڵاتی سەرۆک بایدن و سەرۆکی پێشووی ئەمەریکا دانۆڵد ترامپدا، زەڵمای خەلیلزاد وەکو نوێنەری تایبەتی ئەمەریکا بۆ ئەفغانستان کاریکردووە.

بەرلەوەش لەژێر دەسەڵاتی سەرۆکی پێشووتری ئەمەریکا جۆرج دەبلیو بوشدا وەکو باڵیۆزی ئەمەریکا لە نەتەوە یەکگرتووەکان و ئەفغانستان و عێراق کاریکردووە.

خەلیلزاد کە لە ئەفغانستان لەدایک بووە، ڕووبەرووی ڕەخنە بۆوە لەسەر چۆنێتی سەرپەرشتیکردنی گفتوگۆکان لەگەڵ تاڵیبان و حکومەتی ئەفغانستاندا لە ساڵی 2018 دا.

خەلیلزاد شکستی هێنا لەوەدا کە حکومەتی پێشووی ئەفغانستان و تاڵیبان ڕازیبکات دەسەڵاتەکان دابەش بکەن، بەڵام لە مانگی دووی ساڵی 2020 دا بەشداری گفتوگۆکانی نێوان ئەمەریکا و تاڵیبانی کرد، کە دواتر بووە هۆی کشانەوەی هێزەکانی ئەمەریکا لە ئەفغانستان.

لە نامەکەیدا بۆ بلینکن. خەلیلزاد دانی بەوەداناوە کە نەیتوانیوە حکومەتی ئەفغانستان و تاڵیبان ڕازیبکات دەسەڵات لەنێوانیاندا دابەش بکەن.

لە نامەکەیدا دەڵێت " ڕێکەوتنی سیاسیی نێوان حکومەتی ئەفغانستان و تاڵیبان بەوشێوەیە نەڕۆیشت کە مەزەندە کرابوو."

وتیشی " هۆکاری ئەوە زۆر ئاڵۆزە و لە ڕۆژان و هەفتەکانی داهاتوودا بۆچوونەکانی خۆم دەخەمە ڕوو."

خەلیلزاد لە نامەکەیدا ئاماژە بەوە دەکات " ئێستا کاتەکەی گونجاوە بۆ دەست لەکارکێشانەوەم، ئەمەریکا ئێستا لە پەیوەستگەیەکدایە کە لێوەی دەچینە قۆناغێکی نوێوە لە سیاسەتماندا بەرامبەر ئەفغانستان."

سەرچاوە/ دەنگی ئەمەریکا

XS
SM
MD
LG