کاربەدەستانی ئەمەریکا و فلپـین تاووتوێی بەرنامەیەکی نوێـیان کرد بۆ یارمەتیدانی حکومەتی فلپـین لە نەهێشتنی توندڕەوی ئیسلامی کە بووەتە هۆی کوژرانی هەزاران کەس و ئاوارە بوونی سەدان هەزار کەسی دیکە لەو وڵاتە.
دێنس نەتالی یاریدەدەری وەزیری دەرەوەی ئەمەریکا ئەمڕۆ سێشەممە لە کۆنگرەیەکی ڕۆژنامەوانی لە شاری ماندالویۆنگی فلپـین گوتی بەرنامەکە بۆ ماوەی 3 ساڵە و تیایدا یارمەتی کاربەدەستانی خۆجێی دەدرێت لە دەستنیشانکردنی ئەو کێشانەی دەبنە مایەی توندڕەوی ئیسلامی وە چۆنیەتی چارەسەرکردنیان.
گوتیشی توێژینەوەکانیان نیشانیان داوە خراپی باری ئابوری و ژیان و گوزەرانی خەڵکی زیاتر هۆکاری توندڕەوین. ئاماژەی بۆ ڕووداوەکانی ساڵی 2017 ی شاری ماراوی باشوری وڵاتەکە کرد کە بۆ ماوەی 5 مانگ چەکدارانی توندڕەو گەمارۆی شارەکەیان دابوو و سەرئەنجام سەدان کەس کوژران و سەدان هەزار کەسیش ئاوارەبوون.
خانم دێنس نەتالی باسی لەوەش کرد توێژینەوەکان لە ساڵی ڕابردوو لە چوار ناوچەی زۆرینە موسڵمانی باشوری فلپـین ئەنجامدراون.