Accessibility links

چەکدارانی سەر بە حکومەتی سوریا لە نزیک قامیشلوو ڕێگری دەکەن لە هێزێکی ئەمەریکا


هێزێکی ئەمەریکا کە پـێکهاتبوو لە ژمارەیەک ئۆتۆمبیلی زرێپـۆش هەوڵیان دابوو بە نێو گوندێکی عەرەب نشین لە باشوری ڕۆژهەڵاتی شاری قامیشلو تێپەڕببن، بەڵام لەلایەن چەکدارانی سەر بە حکومەتی سوریاوە ڕێگریان لێکراوە و لە ئەنجامدا پـێکدادان ڕوویداوە و کەسێک کوژراوە.

بەیانی ئەمڕۆ چوارشەممە لە دەروازەی گوندی خەربەت عەمۆ کە نزیکەی 3 کیلۆمەتر لە قامیشلووەوە دورە، ڕێگری لەو هێزەی ئەمەریکا کرا و دەمەقاڵی لە نێوان هێزەکە و چەکدارەکانی حکومەت دەستیپـێکرد و هاوکات ژمارەیەک لە دانیشتوانی گوندەکە لە دەوری هێزەکەی ئەمەریکا گردبوونەوە و کەوتنە بەردبارانکردنی هێزەکە.

پاشان چەکدارەکانی حکومەت ڕاستەوخۆ تەقەیان لە ئۆتۆمبیلەکان کرد و سەربازە ئەمەریکایـیەکانیش وەڵامیان دایەوە و چەکدارێکی سەر بە حکومەت کوژرا. 5 ئۆتۆمبیلی هێزەکەی ئەمەریکا توانیبوویان بە گوندەکەدا تێپەڕببن، بەڵام 3 ئۆتۆمبیلی دیکەیان مایەوە.

فڕۆکە جەنگیـیەکانی ئەمەریکا دەستبەجێ گەیشتنە ئاسمانی ناوچەکە و دیواری دەنگیان بەزاند بە ئامانجی دروخستنەوەی چەکدارەکان و خەڵکەکە لە هێزەکە.

دواتر هێزێکی ڕووسیا گەیشتە شوێنەکە و هێزەکەی ئەمەریکا توانی ناوچەکە جێبهێڵێت. بەپـێی زانیاریـیەکانی دەنگی ئەمەریکا هیچ سەربازێکی ئەمەریکایی زیانی پـێنەگەیشتووە.

جێی ئاماژەیە دانیشتوانی گوندی خەربەت عەمۆ عەربن لە خێڵی تەی (طيء) .

XS
SM
MD
LG