ئاژانسی دەنگوباسی ئانادۆڵوی نیمچە فەرمی تورکیا دەڵێت هێزەکانی ئەمەریکا دەسـتیانکردووە بە بنیادنانی 2 بنکەی سەربازی لە نزیک شاری مەنبجی باکوری سوریا.
ئاژانسەکە ئەمڕۆ سێشەممە ڕایگەیاند، بەپـێی زانیاری لە سەرچاوەی بڕواپـێکراوەوە، هێزەکانی ئەمەریکا دەستیانکردووە بە فراوانکردنی شوێنی 2 خاڵی چاودێری لە دەوروبەری گوندی ئەلدادات کە نزیکەی 10 کیلۆمەتر لە باکوری شاری مەنبجەوە دورە. دەڵێت یەک لە خاڵەکان نزیکەی 8 کیلۆمەتر دورە لە ڕووباری ساجوری نێوان هێزەکانی قەڵغانی فوراتی تورکیا و هێزەکانی سوریای دیموکرات. خاڵەکەی دیکە لە نزیک کێڵگەی نەعیمەیە کە 4 کیلۆمەتر لە هێزەکانی قەڵغانی فوراتەوە دورە.
سەرچاوەکە گوتوشیەتی هێزەکانی ئەمەریکا دەسـتیانکردووە بە ناردنی کەرەستەی بیناسازی و ئامێری قورس بۆ ناوچەکە تاوەکو دەستبکەن بە بنیادنانی هەردوو بنکەکە.
ماوەی چەند ڕۆژێکە ئەمەریکا هێزی زیاتری بۆ مەنبج ناردووە و زیاتر چاودێری ناوچەی نێوان هەردوو هێزەکە دەکات.
کاربەدەستانی تورکیا چەندان جار باسیان لەوە کردووە کە دەبێت هێزەکانی یەپەگە لە ناوچەی مەنبج بکشێنەوە ئەگەر نا ئەوا بە زەبری هێز لەوێ نایانهێڵن.