ئەمەریکا ڕایگەیاند سزای سەپاندووە بەسەر شەش کەس و سێ لایەندا بە ئامانجی لەناوبردنی ئەو تۆڕە ئێرانیە ڕوسییەی کە ملیۆنان بەرمیل نەوت بۆ حکومەتی سوریا دابین دەکەن و کۆمەکی هەردوو گروپی چەکداری حەماس و حیزبوڵا دەکەن.
بەرپرسانی ئەمەریکا دەڵێن ڕوسیا گەیاندنی نەوتی لە ئێرانەوە بۆ سوریا ئاسان کردووە و کۆمەڵێک ڕێگەی جیاوازی بەکارهێناوە بۆ شاردنەوەی بارە نەوتەکان و ئەو پارەیەی کە دراوە لەبەرامبەر نەوتەکەدا.
وەزیری خەزێنەی ئەمەریکا ستیڤن منوچن لە بەیاننامەیەکدا وتی " ئەمڕۆ دژی پلانە ئاڵۆزەکانی ئێران و ڕوسیا دەجوڵێین کە پشتیوانی لە ڕژێمی سەرۆکی سوریا بەشار ئەسەد دەکەن و پارە بۆ چالاکییە خراپەکانی ئێران دابین دەکەن."
وتیشی " بەرپرسانی بانکی ناوەندی ئێران بەردەوامن لە سوود وەرگرتن لە سیستمی پارەی جیهانی."
وەزارەتی خەزێنەی ئەمەریکا لە بەیاننامەیەکدا وتی کۆمەڵێک کەس و لایەن سزایان بەسەردا سەپێندراوە لەوانەش محەمەد عامر شوەیکی و کۆمپانیاکەی ڤەیگن گروپ و بنکەکەی لە ڕوسیا.
وەزارەتەکە وتیشی ئامانجەکانی دیکە هاوڵاتی سوریی حاج عەبدول ناسڕ و هاوڵاتی لوبنانی محەمەد قاسم بەزال و هاوڵاتی ڕوسیا ئاندرییە دوگاییڤ و دوو هاوڵاتی ئێرانی بە ناوەکانی ڕەسوڵ سەجاد و حسێن یەعقوب میابنن.
ئەم سزایانەی وەزارەتی خەزێنەی ئەمەریکا بۆ سەر کەس و لایەنەکان وادەکات دووریان بخاتەوە لە سیستمی پارەی جیهانی و هەموو حسابەکانیان سڕ دەکات، هۆشیاریش دەداتە هەموو ئەو دامەزراوانەی کە مامەڵە لەگەڵ ئەو کەس و لایەنانەدا دەکەن.
سەرچاوە/ ڕۆیتەرز