وەزارەتی دەرەوەی ئەمەریکا وتی نوێنەری تایبەتی ئەمەریکا بۆ کۆریای باکوور ستیڤن بایگەن ڕۆژانی پێنجشەممە و هەینی سەردانی چین دەکات.
دوای ئەوەی کۆمەڵێک گفتوگۆی لەگەڵ کاربەدەستانی کۆریای باشوور و ژاپۆندا کرد، ستیڤن بایگەن بەرەو چین دەڕوات بەمەبەستی گفتوگۆکردن لەگەڵ کاربەدەستانی ئەو وڵاتەدا.
دوای ئەوەی لەم هەفتانەی دواییدا کۆریای باکوور زنجیرەیەک تاقیکردنەوەی موشەکی ئەنجامدا، گرژییەکانی نێوان واشنتن و پیۆنگیانگ زیادیان کردەوە، ئەمەش ترسی ئەوەی لێدەکرێت ئەو دوو وڵاتە بگەڕێنەوە بۆ هەمان بارودۆخی پێش هەوڵە سیاسییەکان.
بەپێی ڕەشنووسی پڕۆژەیەک، چین و ڕوسیا ڕۆژی دووشەممە پێشنیاری ئەوەیان بۆ ئەنجومەنی ئاسایشی نێودەوڵەتی کردووە هەندێک لە سزاکانی سەر کۆریای باکوور لاببرێن، لەوانەش هەناردەکردنی هەندێک کەلوپەل.
ڕوسیا وتی ئامانج لە ڕەشنووسەکە هاندانی دانوستانەکانی نێوان ئەمەریکا و کۆریای باکوورە.
بەرپرسێکی وەزارەتی دەرەوەی ئەمەریکا وتی لە ئێستادا کاتەکە گونجاو نیە ئەنجومەنی ئاسایش تاوتوێی لابردنی سزاکانی سەر کۆریای باکوور بکات، چونکە " کۆریای باکوور هەڕەشەیە بۆ سەر سەقامگیری ناوچەکە و ڕەتی دەکاتەوە گفتوگۆ لەسەر داماڵینی چەکی ناوەکی بکات، هەروەها بەردەوامە لە پاراستنی چەکە کۆمەڵکوژە قەدەغەکراو و بەرنامە موشەکیە باڵیستیکیەکەی و پەرەپێدانیان."
سەرچاوە/ ڕۆیتەرز