وەزیری دەرەوەی ئەمەریکا دەڵێت دەبێت ئێران سەربازەکانی و ئەو هێزانەشی پاڵپشتیـیان دەکات لە سوریا بیانکێشێتەوە.
ڕێکس تیلەرسن ئەمڕۆ چوارشەممە لە کۆنگرەیەکی ڕۆژنامەوانی لەگەڵ ئەیمەن ئەلسەدەفی هاوتا ئوردنیـیەکەی ئەمەی ڕاگەیاند و گوتی دەبێت قەیرانی سوریا بەپـێی بڕیاری 2254 ی ئەنجومەنی ئاسایشی نەتەوە یەکگرتووەکان و وتووێژەکانی ئاشتی جنێڤ چارەسەربکرێت.
تاران لای خۆیەوە لە زاری عەلی ئەکبەر ویلایەتی یاریدەدەری باڵای خامەنەئی ڕێبەری باڵای ئێران وەڵامی لێدوانەکەی تیلەرسنی داوەتەوە و بە ئاژانسی دەنگ‌وباسی ISNA ی گوتووە بوونی لەشکری ئێران لە سوریا لەسەر داوای حکومەتی سوریایە، وە ئەوانەی دەبێت لە سوریا بکشێنەوە، ئەوانەن کە بەبێ مۆڵەتی حکومەتی سوریا چوونەتە ناو ئەو وڵاتەوە.