Accessibility links

وەزیری بەرگری ئەمەریکا: هێزەکانی ئەمەریکا ناتوانن خەڵکەکە بگەیەننە فڕۆکەخانەی کابوڵ


وەزیری بەرگری ئەمەریکا لوەید ئۆستن
وەزیری بەرگری ئەمەریکا لوەید ئۆستن

وەزیری بەرگری ئەمەریکا لوەید ئۆستن وتی هێزەکانی ئەمەریکا ناتوانن خەڵکەکە بگەیەننە فڕۆکەخانەی کابوڵ تاوەکو بگوازرێنەوە.

جێی ئاماژەیە خێرایی کۆنتڕۆڵکردنەوەی ئەفغانستان لەلایەن تاڵیبانەوە لەکاتێکدا کە هێزەکانی هاوپەیمانان و ئەمەریکا دەکشانەوە، بووە هۆی بێسەروبەری لە فڕۆکەخانەی کابوڵ، ئەوەش دوای ئەوەی دیبلۆماتکاران و هاوڵاتیانی بیانی و ئەفغانیەکان بەخێرایی هەوڵیاندا بگەنە فڕۆکەخانەکە. بەڵام هەندێکیان بەهۆی خاڵە پشکنینەکانی چەکدارانی تاڵیبانەوە لە کابوڵ ناتوانن بگەنە فڕۆکەخانەکە.

ئۆستن بە ڕۆژنامەنووسانی وت " هەرچی لە تواناماندا بێت دەیکەین بۆ دابینکردنی ڕێڕەوێکی پارێزراو بۆ ئەو خەڵکانە تاوەکو بگەنە فڕۆکەخانەکە. لە توانامدا نیە بچمە دەرەوەی فڕۆکەخانەکە و ئەرکەکانمان فراوان بکەم بۆ ناو کابوڵ."

ئۆستن وتی نزیکەی 4500 سەربازی ئەمەریکی لە کابوڵ بوونیان هەیە و " هیچ بەریەککەوتنێکی دوژمنکارییانە لەگەڵ تاڵیباندا ڕووینەداوە، هەروەها هێڵەکانی پەیوەندییمان لەگەڵ تاڵیباندا بەکراوەیی دەمێننەوە."

وتیشی " ئەو هەواڵانەمان بیستووە خەڵک لە خاڵەکانی پشکنینەوە گەڕێندراونەتەوە، ئەوەمان بە تاڵیبان وتووە و پێمان وتوون ئەگەر ئەو کەسانەی دەیانەوێت بێنە فڕۆکەخانەکە بەڵگەنامە یاخود پێناسیان پێبێت ئەوا دەبێت ڕێگەیان پێبدرێت."

سەرچاوە/ ڕۆیتەرز

XS
SM
MD
LG