Accessibility links

جەنەڕاڵ ڤۆتێل داوا لە وڵاتانی کەنداو دەکات خۆیان یەکبخەن بۆ ڕووبەڕووبوونەوەی هەڕەشەکانی ئێران


سەرۆکی فەرماندەیەتی ناوەندی لەشکری ئەمەریکا داوای لە وڵاتانی کەنداو کرد ناکۆکیـیەکانیان وەلاوە نێن و خۆیان یەکبخەن بۆ ڕووبەڕووبوونەوەی هەڕەشەکانی ئێران و گروپە توندڕەوەکان.

جەنەڕاڵ جوزێف ڤۆتێل ئەمڕۆ چوارشەممە لە کۆبوونەوەی سەرۆکانی ئەرکانی لەشکری وڵاتانی ئەنجومەنی هاریکاری کەنداو لە کوەیت ئەم داواکاریـیەی بۆ ئامادەبووان ڕاگەیاند و گوتی دوو هەڕەشە لە ناوچەکەدا بەردەوامن ئەوانیش کارە ناسەقامگیریـیەکانی ئێران و ڕکخراوە توندڕەوەکانی توندوتیژی ئەنجام دەدەن.

کۆبوونەوەکە فەریق ڕوکن غانم بن شاهین ئەلغانم سەرۆکی ئەرکانی قەتەر تیایدا بەشداربوو، لەم کاتەی گرژی لە نێوان قەتەر و ژمارەیەک لە وڵاتانی عەرەبی هەیە. جەنەڕاڵ ڤۆتێل جەختی کردەوە کە دەبێت ئەم وڵاتانە تواناکانیان بەهێز و یەکبخەن و لە هەموو بوارێکدا پەرە بەخۆیان بدەن لە پـێناو ئاسایشی نەتەوەیـیان.

ئەم ئەفسەرە باڵایەی لەشکری ئەمەریکا لە کۆبوونەوەکە دووپاتیکردەوە ئەمەریکا دەستبەرداری ناوچەکە و هاوبەشەکانی نابێت و گوتی ئاستی بایەخدانی فەرماندەیەتی ناوەندی لەشکری ئەمەریکا بە ناوچەکە نەگۆڕاوە.

جێی ئاماژەیە هەردوو سەرۆک ئەرکانی لەشکری میسر و ئوردن ئامادەی کۆبوونەوەکە بوون.

لەم دوایـیانە خالید جارالله جێگری وەزیری دەرەوەی کوەیت گوتی وڵاتەکەی تاووتوێی پـێشنیارێکی ئەمەریکا دەکات بۆ پـێکهێنانی هاوپەیمانێتیـیەکی ستراتیژی لە ڕۆژهەڵاتی ناوەڕاست بە ئامانجی ڕووبەڕووبونەوەی هەژمونی ئێران.

XS
SM
MD
LG