لەشکری ئەمەریکا دەڵێت بەهۆی تەقینەوەی بۆمبێکی چێنراو لەلا ڕێگایەک لە هەرێمی غەزنی لە ڕۆژهەڵاتی ئەفغانستان 3 سەربازی ئەمەریکایی کوژراون.
لەشکر لە بەیانـنامەیەکدا ڕایگەیاند بۆمبەکە دەستکردبووە و ئەمڕۆ سێشەممە لە نزیک شاری غەزنی تەقینەوەتەوە و جگە لەو 3 سەربازەی کوژراون، 3 سەربازی دیکە و کۆنتراکتەرێکی ئەمەریکایی برینداربوون.
ئەفسەر ئوبۆن مەندی گوتەبێژی هێزەکانی ئەمەریکا بۆ میدیاکانی ڕاگەیاند بریندارەکان لە شوێنی ڕووداوەکە گواستراونەتەوە و ئێستا چارەسەری پـزیشکیـیان بۆ دەکرێت.
هەتا ئامادەکردنی ئەم هەواڵە کەس بەرپـرسیارێتی خۆی لە هێرشەکە ڕانەگەیاندووە.
جێی ئاماژەیە تاڵیبان جموجۆڵێکی زۆری لە هەرێمی غەزنی هەیە و مانگی هەشت هەوڵی دابوو دەستبگرێت بەسەر شاری غەزنی ناوەندی هەرێمەکە. غەزنی تاکە هەرێمی ئەفغانستان بوو کە هەڵبژاردنە پەرلەمانیـیەکەی مانگی دەی لێ ئەنجام نەدرا.