نەتەوە یەکگرتووەکان وتی 10 منداڵ لە یەک خێزان و 3 هاوڵاتی دیکەی مەدەنی بەهۆی هێرشێکی ئاسمانی ئەمەریکاوە لە ئەفغانستان کوژراون.
بەرەبەیانی ڕۆژی شەممە ئەمەریکا هێرشێکی ئاسمانی ئەنجامدا لە چوارچێوەی پێکدادانەکانی نێوان تاڵیبان و هێزەکانی ئەفغانستان و ئەمەریکادا لە هەرێمی قەندوز کە نزیکەی 30 کاتژمێری خایاند.
نوێنەرانی نەتەوە یەکگرتووەکان بۆ پێشکەشکردنی یارمەتی لە ئەفغانستان لە زانیارییە سەرەتاییەکانەوە لەسەر ڕووداوەکە وتیان ژمارەیەک منداڵ و خێزانەکانیان بەهۆی بوونی شەڕ و پێکدادانەوە هەڵهاتوون بۆ ناوچەکانی دیکەی وڵاتەکە. وتیشی لێکۆڵینەوە لە هەموو ئەو هاوڵاتییە مەدەنییانە دەکات کە ژمارەیان دەگاتە 13 کەس و بەهۆی هێرشە ئاسمانییەکەوە کوژراون.
وتەبێژی ئەرکەکەی هاوپەیمانێتی ناتۆ لە ئەفغانستان دێبرا ڕیچاردسن وتی هێزەکانی ئەمەریکا هێرشێکی ئاسمانیان ئەنجامداوە و ئاماژەشی بەوەدا لە ئەرکەکەیاندا هەمیشە هەوڵدەدەن خۆیان بەدووربگرن لە کەوتنەوەی قوربانیانی مەدەنی لەکاتێکدا چەکدارانی تاڵیبان بە ئەنقەست لەنێو هاوڵاتییە مەدەنییەکاندا خۆیان حەشار دەدەن.
سەرچاوە/ ڕۆیتەرز